ޑިމޮކްރެޓްސްގެ މެންބަރުންނަށް ނޭނގި، އެ ޕާޓީން ވަކިކޮށް ވެރިކަން ކުރާ ޕާޓީ ޕީއެންސީއަށް ވައްދާފައިވާކަމަށް ބުނެ، އެ ޕާޓީން މިއަދު ޕޮލިހަށް މައްސަލަ ހުށަހަޅައިފިއެވެ.
ޑިމޮކްރެޓްސް އިން ބުނީ ރާއްޖޭގެ ގާނޫނުލްއުގޫބާތުގައި ބަޔާންކުރާ ހަމަތަކުގެ މަތިން އެ މައްސަލަ ތަހުގީގުކޮށް އެ އަމަލު ހިންގި މީހުންގެ މައްޗަށް ޖިނާއީ ދައުވާ އުފުލައިދިނުމަށް އެދި ޕޮލިހަށް މައްސަލަ ހުށަހަޅާފައިވާ ކަމަށެވެ. އަދި ސިޔާސީ ޕާޓީތަކުގެ ގާނޫނުގައި ބަޔާންކުރާ ހަމަތަކުގެ މަތިން އެ އަމަލު ހިންގި ބަޔަކު ޖޫރިމަނާކޮށް، ޕާޓީގެ ދަފްތަރުން އުނިކޮށްފައިވާ މެންބަރުންގެ އަލުން އެ ޕާޓީގައި ރަޖިސްޓްރީކޮށް ދިނުމަށް އިލެކްޝަން ކޮމިޝަނަށް ހުށަހަޅާފައިވާ ކަމަށެވެ.
ޑިމޮކްރެޓްސްގެ 700 އެއްހާ މެންބަރުން އޮޅުވާލައިގެން ޕީއެންސީއަށް ވައްދާފައި ވާކަމަށް އެ ޕާޓީން ތުހުމަތު ކޮށްފައި ވާއިރު، ޕީއެންސީއަށް މެންބަރުން އިތުރުކުރުމަށް ސައްހަ ނޫން ފޯމުތަކެއް ހުށަހަޅާފައިވާ މައްސަލަވެސް ވަނީ ފެންމަތިވެފައެވެ. އެގޮތުން އިދިކޮޅު އެމްޑީޕީ އިން ވަނީ އެ ޕާޓީގެ 3000 އެއްހާ މެންބަރުންނަށް ނޭނގި ޕީއެންސީގައި ދަފްތަރު ކޮށްފައި ވާކަަމަށް ބުނެފައެވެެ. އަދި ޑިޕާޓްމަންޓް އޮފް ނެޝަނަލް ރަޖިސްޓްރޭޝަންގެ މީޓިން ރޫމުގައި ގިނަ އަދަދެއްގެ ފޯމު ފުރާ މަންޒަރު ފެންނަ ފޮޓޯތަކެއް ވެސް ސޯޝަލް މީޑިއާގައި ވަނީ ދައުރުވެފައެެވެ.
މި މައްސަލަ ފެންމަތިވުމާ ގުޅިގެން އީސީ އާއި ސަރުކާރަށްވެސް ގިނަ ބައެއްގެ ފާޑުކިޔުންތަކެއް އަމާޒުވެފައި ވާއިރު ސިޔާސީ ޕާޓީތަކުގެ ދަފްތަރު އާންމުކޮށް އީސީ އިން ވަނީ އަންނަ މަހުގެ 10ގެ ކުރިން ޝަކުވާ ހުށަހަޅަން ހުޅުވާލާފައެވެ.
