ބިދޭސީންގެ މައްސަލަ ހައްލު ކުރުމަށް މޯލްޑިވްސް އިމިގްރޭޝަނުން ކުރަމުންދާ މަސައްކަތްތަކުގެ ދަށުން، މާލޭގައި އާއްމު ސިއްހަތަށް ނުރައްކާވާ ގޮތަށް ދިރިއުޅެމުންދިޔަ ތަނެއް ބަލާ ފާސްކޮށް ބިދޭސީން ހައްޔަރުކޮށްފިއެވެ.
އިމިގްރޭޝަނުން ބުނީ ޖަނަވަރީ 23، 2025 ވަނަ ދުވަހު ޓާސްކުފޯހުން މާލޭގައި ހިންގި ރެއިޑު އޮޕަރޭޝަނެއްގައި، އާންމު ސިއްހަތަށް ނުރައްކާވާ ގޮތަށް، ބިދޭސީން ދިރިއުޅެ، ވިޔަފާރި ކުރަމުންދިއަ ތަނެއް ބަލާ ފާސްކޮށްފައިވާ ކަމަށެވެ. އަދި ގަވާއިދާ ހިލާފަށް އެތަނުގައި އުޅެމުންދިޔަ 13 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާކަމަށް ވަނީ ބުނެފައެވެ.
އިމިގްރޭޝަނުން އާންމުކޮށްފައިވާ ވީޑިއޯ އިން ފެންނަ ގޮތުން އެތަނުގައި ގިނަ އަދަދެއްގެ ބިދޭސީން އުޅެމުން ދިޔަކަން ފާޙަގަކުރެވެއެވެ، އަދި އިމިގްރޭޝަންގެ އޮފިޝަލުން އެތަނަށް ދިޔަ އިރުވެސް ކާއެއްޗެހި ތައްޔާރުކުރުމުގެ މަސައްކަތް ކުރިއަށް ދެއެވެ. ކުޑަ ތަންކޮޅެއްގެ ތެރޭގައި އުޅެމުން ދިޔަ ބިދޭސީންގެ ޕާސްޕޯޓާއި އެހެނިހެން މުހިއްމު ލިޔުންތައް އިމިގްރޭޝަނުގެ އޮފިޝަލުން ބަލަމުންދާ މަންޒަރު ފެންނައިރު، އެތަނުގައި ގިނަ އަދަދެއްގެ ކާބޯތަކެތި ތައްޔާރުކުރުމަށް ބަހައްޓާފައިވާ މަންޒަރުވެސް ފެނިގެން ދެއެވެ.
މާލެ އާއި ރާއްޖޭގެ އަތޮޅުތެރޭގައި ގަވައިދާ ހިލާފަށް އުޅެމުން އަންނަ ބިދޭސީންގެ މައްސަލަ ހައްލުކުރުމަށް ގިނަ މަސައްކަތްތަކެއް ކުރަމުން އަންނަކަން ފާހަގަކޮށްލެވެއެވެ.
