ރޭ ފަތިހު މާލޭގައި ހުންނަ ފްރުޓް ޓްރީ އެޕަލް ނަމަކަށް ކިޔާ ފިހާރައެއްގެ ގުދަނުގައި ރޯވެ ބޮޑެތި ގެއްލުންތަކެއް ވެއްޖެއެވެ.
އެމްއެންޑީއެފް އިން ބުނީ ފަޔާ އެންޑް ރެސްކިޔު ސާވިސްއަށް މި ހާދިސާގެ މައުލޫމާތު ރޭފަތިހު 04:20 ހާއިރު ލިބުމާ އެކު ފަޔާފައިޓަރުން އެ ސަރަހައްދަށް ގޮސް އަލިފާން ނިއްވުމުގެ މަސައްކަތް ފަށާފައިވާކަމަށެވެ.
މިގޮތުން ފަޔާފައިޓަރުން ކުރި މަސައްކަތުން ރޯވެފައިހުރި އަލިފާން ކޮންޓްރޯލް ކުރެވުނީ ފަތިހު 05:27 ހާއިރުކަމަށް އެމްއެންޑީއެފް އިން ވަނީ ބުނެފައެވެ. އަދި އަލިފާންގަނޑު އެއްކޮށް ނިއްވާލާފައިވަނީ 06:00 ހާއިރުކަމަށް އެ މުއައްސަސާ އިން މައުލޫމާތު ދެއެވެ.
މި ހާދިސާގައި އެއްވެސް މީހަކަށް އަނިޔާވެފައި ނުވާއިރު އެމްއެންޑީއެފް އިން ބުނީ ރޯވި ގުދަން ބޭނުން ނުކުރެވޭ ވަރަށް އެއްކޮށް އަނދާފައި ވާކަމަށެވެ. އެހެން ނަމަވެސް އެ ގުދަނާ އިންވެގެން ހުރި ގެއިން މީހުން ހުސްކޮށްފައި ވާއިރު އެ ތަނަަށް ވެސް ވަނީ އަލިފާނުގެ އަސަރު ކޮށްފައެވެ.
މައުލޫމާތު ލިބިފައިވާ ގޮތުން މި ގުދަނަކީ ޗޮކްލެޓާއި ނަޓްސް ގުދަން ކޮށްފައިވާ ތަނެކެވެ.
