ރާއްޖޭގައި ހިންދޫންގެ ރޫހާނީ ފަރުވާގެ ހިދުމަތް ދިނުމަށް މީސްމީޑިއާގައި އިޝްތިހާރުކުރި ތިން މީހަކު އިމިގްރޭޝަނުން އިއްޔެ ހިފަހައްޓައިފިއެވެ.
އިމިގްރޭޝަނުން މިއަދު ބުނީ ހިންދޫންގެ ރޫހާނީ ފަރުވާގެ ހިދުމަތް ދޭން އުޅުނު މައްސަލައިގައި އިންޑިއާގެ ތިން މީހަކު އިއްޔެ ހިފަހައްޓާފައިވާ ކަމަށެވެ. އެއީ 18 އަހަރާއި 25 އަހަރާއި 39 އަހަރުގެ ފިރިހެނުންނެވެ.
އެ ތިން މީހުން ފުރުވާލުމުގެ މަސައްކަތް ކުރަމުންދާ ކަމަށް ވެސް އިމިގްރޭޝަނުން ބުންޏެވެ.
"މާސްޓާ ދުރްގާ ރާއޯ ގުރުޖީ"ގެ ނަމުގައި ފޭސްބުކްގައި ހިންގާ ޕޭޖުގައިވާ ގޮތުން، އެއީ އަތާއި މޫނު ބަލައިގެން އަދި ހޮރޮސްކޯޕް މެދުވެރިކޮށް ދިމާވެފައިވާ ހުރިހާ މައްސަލައަކަށް ހައްލު ހޯދައިދޭ ބައެކެވެ. އެގޮތުން ކޮންމެ ސެޝަނަކަށް 300ރ ނަގާ ކަމަށް ވެސް އެ ޕޭޖުގައި ޖަހާފައިވާ އިޝްތިހާރުގައި ވެއެވެ.
މިދިޔަ އޮގަސްޓު މަހުވެސް ވަނީ ހިންދޫ ދީނުގެ ފާދިރީއަކު މާލޭގައި "ސްޕިރިޗުއަލް ހީލިން" ކްލާސްތަކެއް ބާއްވަން އިސްތިހާރު ކޮށް އެފަދަ ކްލާސްތަކެއް ބާއްވައިފައެވެ. ޑރ. ގަނޭޝް ޑުބޭ ނަމަކަށް ކިޔާ އެ މީހާ ފަހުން ވަނީ ހައްޔަރުކޮށް ޑީޕޯޓުކޮށްލައިފައެވެ.
