ހޯމް މިނިސްޓްރީގެ ސިޔާސީ މުވަައްޒަފުންތަކެއް ޑިޕާޓްމަންޓް އޮފް ނޭޝަނަލް ރެޖިސްޓްރޭޝަން (ޑީއެންއާރު) ގައި ޕީއެންސީއަށް މެންބަރުން އިތުރު ކުރުމަށް ފޯމް ފުރި ކަމަށް އެއްބަސްވެފައި ވާތީ މި މައްސަލަ ބަލައި ފިޔަވަޅު އަޅަން ޖެހޭ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް ވިދާޅުވެއްޖެއެވެ.
ފައްޔާޒް ވިދާޅުވީ، މިއަދު ޑީއެންއާރްގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބު ނުދެއްވާ ހޯމް މިނިސްޓްރީގެ އިސްވެރިން ފިއްލެވި ނަމަވެސް މިކަމުގެ ހަގީގަތް މިއޮތީ ހާމަވެފައި ކަމަށެވެ. ޕީއެންސީއަށް ވަގު ފޯމު ފުރީ ރައްޔިތުންގެ ޒާތީ މައުލޫމާތު ރައްކާކުރެވިފައިވާ ދައުލަތުގެ މުއައްސަސާއެއްގެ ތެރޭގައި ދައުލަތުގެ މުދާ ބޭނުންކޮށްގެން އެ ތަނުގެ މުވައްޒަފުން ކަމަށް ފައްޔާޒް ވިދާޅުވިއެވެ.
ޑީއެންއާރުގެ ވެރިން މި ކުށަށް އިއުތިރާފުވެފައި ވާތީ މައްސަލަ ބަލައި އިދާރާތަކުން ފިޔަވަޅު އަޅަން ޖެހޭނެ ކަމަށާއި ޕީއެންސީއިން މިދިޔަ މުއްދަތުގައި އީސީއަށް ހުށަހެޅި ފޯމުތައް ބާތިލުކުރަން ޖެހޭނެ ކަމަށް ވެސް ފައްޔާޒް ވިދާޅުވިއެވެ.
ގިނަ އަދަދެއްގެ މީހުންގެ ޒާތީ މައުލޫމާތު ހުއްދަ ނެތި ބޭނުން ކޮށްގެން ޕީއެންސީ މެންބަރެއްގެ ގޮތުގައި ރަޖިސްޓަރީ ކުރާ މައްސަލަ ފެންމަތިވެފައި ވަނިކޮށް، ޑީއެންއާރް ތެރޭގައި އެ މަސައްކަތް ކުރާ ފޮޓޯތަކެއް ސޯޝަލް މީޑިއާގައި ލީކުވެފައެވެ. އެ ފޮޓޯތަކުން ހޯމް މިނިސްޓަރު އަލީ އިހުސާނާއި އެ މިނިސްޓްރީގެ ސްޓޭޓް އަދި ޑެޕިއުޓީ މިނިސްޓަރުންތަކެއް ފެނެއެވެ. ދައުރުން ބޭރުގައި މަޖިލީހުގައި ބޭއްވި ޖަލސާގެ ތެރޭގައި އެ ފޮޓޯތައް ހިއްސާކޮށް އެމްޑީޕީން އެތައް ސުވާލުތަކެއް ކުރި ނަމަވެސް އެއީ އަސްލެއް ނޫން ކަމަށް ޕީއެންސީގެ މެންބަރުން ވަނީ ބުނެފައެވެ.
މިއަދު ޑިއެންއާރުން ވަނީ އެތަނުގައި ކުރާ މަސައްކަތްތައް ނޫސްވެރިންނަށް ދައްކާލާފައެވެ. އެގޮތުން ސޯޝަލް މީޑިއާގައި ދައުރުވި ފޮޓޯތަކުން ފެންނަ މީޓިން ރޫމް ވެސް ވަނީ ނޫސްވެރިންނަށް ދައްކާލާފައެވެ. އެ އަށް ފަހު، ޑީއެންއާރު އޮފީސް ދޮރުމަތީގައި ބޭއްވި ނޫސްވެރިންގެ ބައްދަލުވުމުގައި މައުލޫމާތު ދެއްވަން ހުންނެވީ ވެސް ޕާޓީ ފޯމް ފުރަމުން ދިޔަ ކަމަށް ތުހުމަތުވާ ފޮޓޯތަކުގައި ފެންނަ ހޯމް މިނިސްޓްރީގެ ސްޓޭޓް މިނިސްޓަރު އަބްދުލް މަޖީދު އިބްރާހިމާއި ޑެޕިއުޓީ މިނިސްޓަރު އަހުމަދު އަލީއެވެ.
ނޫސްވެރިންގެ ސުވާލުތަކަށް ޖަވާބު ދެއްވަމުން މަޖީދު ވިދާޅުވީ، ޑީއެންއާރްގެ ތެރޭގައި ވަކިން އިންނަ މީޓިން ރޫމަކީ އެހެން ޑިޕާޓްމަންޓުތަކުން ވެސް އެދިއްޖެ ނަމަ ބޭނުން ކުރަން ދޭނެ ތަނެއް ކަމަށެވެ. އެތަނުގައި މިނިސްޓަރު އަލީ އިހުސާން އިސްވެ ހުންނަވައިގެން އެ މިނިސްޓްރީގެ ދަށުގައި ހުރި މުއައްސަސާތަކަށް ނިސްބަތްވާ ސިޔާސީ މީހުން ހިމެނޭ "ހޯމް ޓީމެއް" ވަނީ ޕީއެންސީ އަށް ފޯމްތައް ފުރާފައި ކަމަށް މަޖީދު ވިދާޅުވިއެވެ. ހޯމް މިނިސްޓްރީގެ ސިޔާސީ މީހުންގެ ގޮތުގައި ތިބި ހުރިހާ ފަރާތްތަކަށް ވެސް އެ ފަރާތެއް މެދުވެރިކޮށް ޕާޓީ އަށް މެންބަރުން އިތުރު ކުރުމަށްޓަކައި މެންބަރުން ވެއްދުމުގެ ކަންކަން ގެންގޮސްދިނުމަށް އެދިފައިވާ ކަމަށް މަޖީދު ވިދާޅުވިއެވެ. އެގޮތުން މިނިސްޓްރީގެ ދަށުން 56 ސިޔާސީ މަގާމެއްގައި ބޭފުޅުން ތިއްބަވާ ކަމަށް ވެސް އޭނާ ވިދާޅުވެފައި ވެއެވެ.
