ކައުންސިލްތަކުން އިސްނަގައިގެން ރަށުގެ ތަރައްގީއަށް މަސައްކަތްކުރުމަކީ ވަރަށް ބޮޑަށް ބަލައިގަންނަކަމެއްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
އަދު އެމަނިކުފާނު ރ. އަތޮޅަށް ފެއްޓެވި ދަތުރުފުޅުގެ ތެރެއިން ވާދޫއަށް ވަޑައިގެން އެރަށުގެ ކައުންސިލާއި، އަންހެނުންގެ ތަރައްގީއަށް މަސައްކަތްކުރާ ކޮމިޓީ އާއި ރަށުގެ މުއައްސަސާތަކުގެ އިސްވެރިނާއި ބައްދަލުކުރައްވައި ދެއްކެވި ވާހަކަފުޅުގައި ރައީސް ވަނީ ވާދޫ ކައުސިލުން ރަށުގެ ތަރައްގީއަށް ކުރައްވާ މަސައްކަތްތަކަށް ތައުރީފުކުރައްވާ އެގޮތުގައި މަސައްކަތްތައް ކުރިއަށްގެންދިއުމަށް އެދިވަޑައިގެންފައެވެ.
ވާދޫ ކައުންސިލް އިދާރާގައި ކުރިއަށް ދިޔަ މި ބައްދަލުކުރެއްވުމުގައި ވާހަކަފުޅު ދައްކަވަމުން ކައުންސިލުން ވަނީ އެ ރަށުގެ ތަރައްގީއަށް ކުރަމުންދާ މަސައްކަތްތައް ރައީސް އާއި ހިއްސާކޮށްފައެވެ. އަދި މި ބައްދަލުކުރެއްވުމުގައި އެ ރަށު ކައުންސިލުން ވަނީ ރަށުގެ މުސްތަގްބަލަށްޓަކައި އިއާދަކުރަނިވި ހަކަތައިގެ މަޝްރޫއު ކުރިއަށްދާ ގޮތް ހިއްސާކޮށް އެމަސައްކަތް ފުރިހަމަ ކުރުމަށް ބޭނުންވާކަން ފާހަގަކޮށްފައެވެ.
މީގެ އިތުރުން ރަށް ގިރުމުގެ މައްސަލައަށް އަވަސް ހައްލެއް ބޭނުންވާކަމަށާއި، ރަށުގެ ސިއްހީ މަރުކަޒަށް ބޭނުންވާ ހިދުމަތްތަކާއި، ރަށުގެ ޒުވާނުންނަށް ހާއްސަކޮށް ކުޅިވަރުގެ ދާއިރާ ކުރިއެރުވުމަށް ބޭނުންވާ ކަންކަން ކައުންސިލުން ވަނީ ހިއްސާކޮށްފައެވެ. މީގެ އިތުރުންވެސް ރަށަށް އަރައި ފޭބުމުގައި ހުރި ދަތިކަން ފާހަގަކޮށް ބަނދަރުގެ މަސައްކަތް އަވަހަށް ފުރިހަމަކޮށް ދިނުމަށް ކައުންސިލުން ވަނީ އެދިފައެވެ.
މި ބައްދަލުކުރެއްވުމުގައި ވާހަކަފުޅު ދައްކަވަމުން ރައީސް ވިދާޅުވީ އިއާދަކުރަނިވި ހަކަތަ ބޭނުންކުރުން އިތުރުކުރުމަކީ ސަރުކާރުގެ މުހިންމު އަމާޒެއްކަމަށެވެ. އަދި ވާދޫގައި މިހާރު ކުރިއަށްދާ ސޯލާ ޕްރޮޖެކްޓް ނިމޭއިރު މުޅި ރަށުގެ ކަރަންޓުގެ މައްސަލައަށް ޖުމްލަގޮތެއްގައި ފުރިހަމަ ހްއްލެއް ލިބިގެންދިއުމަށް ބޭނުންވާކަމުގައި އެމަނިކުފާނު ވިދާޅުވިއެވެ. މީގެ އިތުރުން މި ބައްދަލުކުރެއްވުމުގައި ފާހަގަކުރެއްވި ކަންކަން ބައްލަވާނެކަމުގައި ރައީސް ވިދާޅުވިއެވެ.
