ދިވެހިންގެ ތެރޭގައިވެސް މަގުބޫލު ފިލްމީ އެކްޓަރު ސައިފް އަލީ ހާން އަށް ވަޅިން ހަމަލާދިނީ ބަންގްލަދޭޝްގެ ރައްޔިތެއް ކަމަށް ބެލެވޭ ކަމުގައި ބޮމްބޭ ފުލުހުން ބުނެފިއެވެ.
ސައިފްގެ ހަށިގަނޑުގެ 6 ތަނަކަށް ވަޅިން ހަމަލާ ދީފައި ވާ އިރު ހަމަލާ އަމާޒުވި ތަންތަނުގެ ތެރޭގައ އޭގެ އޭނާގެ ކަރާއި ކޯމަތި ހިމެނޭ ކަމަށް ހަބަރުތަކުން ބުނެއެވެ.
މި ހަމަލާގައި ސައިފަށް ލިބުނު ޒަހަމްތަކުގެ ފުންމިން އަދި މުޅިން ސާފު ނުވިނަމަވެސް ސައިފްގެ އަންހެނުން އެކްޓަރު ކަރީނާ ކަޕޫރް ބުނެފައި ވަނީ، އަވަސް ފަރުވާ އާ އެކު ސައިފް އަންނަނީ ރަނގަޅު ވަމުން ކަމަށާއި، 14 ދުވަސް ވާންދެން ހޮސްޕިޓަލުގައި އޮންނަން ޖެހޭނެ ކަމަށް ޑޮކްޓަރުން ބުނެފައި ވާ ކަމަށެވެ.
މި ހާދިސާގެ ތަހުގީގަށް 28 ފުހުން ހިމެނޭ ހާއްސަ ޓީމެއް ބޮމްބޭ ފުލުހުން ނަގާފައި ވާ އިރު އެމީހުން ކުރިއަށް ގެންދާ ތަހުގީގާ ބެހޭ އެންމެ ފަހުގެ މައުލޫމާތު ހިއްސާ ކުރަމުން މިއަދު ބުނެފައި ވަނީ، ތުހުމަތުވާ ބަންގްލަދޭޝްގެ މީހާ ސައިފްގެ ގެއަށް ވަދެފައި ވަނީ ވައްކަން ކުރަން ކަމަށެވެ.
އޭނާ އެގެއަށް ވަނީ ވައްކަން ކުރަން ކަމަށް ފުލުހުން ބުނެފައި ވީ ނަމަވެސް ކަރީނާ ބުނެފައި ވަނީ، ސައިފަށް ހަމަލާ ދިނުމަށް ފަހު އޭނާ ފިލައިގެން ދިޔަ އިރު އެގެއިން އަގުހުރި އެއްވެސް އެއްޗެއް ގެންގޮސްފައި ނުވާ ކަމަށެވެ.
ފުލުހުން ޑެޕިޓީ ކޮމިޝަނަރު ޑިކްސިޓް ގެދަމް ވިދާޅުވީ، ސައިފަށް ހަމަލާދިން ކަމަށް ބެލެވޭ ބަންގްލަދޭޝް މީހާ އިންޑިއާ އަށް އެތެރެވުމަށް ފަހު ވިޖޭ ދާސް ގެ ނަމަށް ނަން ބަދަލު ކޮށްފައި ވާ ކަމަށާއި، އޭނާ ދިރިއުޅޭތަން ބަލައި ފާސްކުރިއިރު، އޭނާ ގެންގުޅޭ އެއްޗެހިން އެއީ ބަންގްލަދޭޝްގެ މީހެއް ކަމަށް ވަރަށް ބޮޑަށް ބެލެވޭ ކަމަށެވެ.
