ޕީޕަލްސް ނެޝަނަލް ކޮންގްރެސް (ޕީއެންސީ) ގެ ސެކްރެޓަރީ ޖެނެރަލްގެ މަގާމަށް ޑިފެންސް މިނިސްޓްރީގެ ސްޓޭޓް މިނިސްޓަރު މުއާޒް ހަލީމް މިއަދު އައްޔަންކޮށްފިއެވެ.
ޕީއެންސީ އިން އެކްސްގައި ކުރި ޕޯސްޓެއްގައި ވަނީ މިކަން އިއުލާނުކޮށް މުއާޒް އަށް މަރުހަބާ ކިޔާފައެވެ.
މި މަގާމުގައި ކުރިން ހުންނެވީ ލޯކަލް ގަވަނަންސް މިނިސްޓަރު އާދަމް ޝަރީފްގެ އަނބިކަނބަލުން ޒީނާޒު އަދުނާން އެވެ. ޒީނާޒުގެ ދައުރު މިދިޔަ މަހުގެ 31 އަށް ހަމަވުމާއެކު މި މަގާމަށް އިތުރު ފަރާތެއް ހަމަޖައްސާފައެއް ނުވެއެވެ.
މިކަން ސަމާލުކަމަށް އައިސްފައިވަނީ ބައެއް ފަރާތްތަކަށް ނޭނގި ވަގު ފޯމުލައިގެންނާއި، ސޮއި ފޯޖު ކޮށްގެން ޕީއެންސީ އަށް މީހުން ވައްދަމުންދާކަމަށް ބުނެ ސޯޝަލް މީޑިއާގައި ވާހަކަތަކެއް ފެތުރިފައިވާ މި ދަނޑިވަޅުގައެވެ.
އެގޮތުން މިއަދު ވަނީ ރައްޔިތުންގެ މަޖިލިހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަންމަތީގައި ވަގު ފޯމެއް ފުރައި ޕީއެންސީއަށް ވެއްދި މައްސަލަ ސީރިއަސް މައްސަލައެއްގެ ގޮތުގައި ތަހުގީގު ކުރުމަށް އެމްޑީޕީން ގޮވާލާފައެވެ. އަދި ރައީސް ޑރ. މުހައްމަދު މުއިއްޒު ވިދާޅުވެފައިވާ ގޮތަށް ކޮންގްރެސް ޕާޓީއަށް އެއް ލައްކަ މެންބަރުން ހަމަކުރަން ކަމަށް ބުނެ، މީހުންގެ ސޮއި ފޯޖުކޮށްގެން ހުށަހަޅަމުންދާ ފޯމުތައް ޕްރޮސެސް ކުރުން ހުއްޓާލުމަށް އީސީގައި އެދިފައިވާނެކަމަށް ވެސް އެމްޑީޕީން ވަނީ ބުނެފައެވެ.
މިކަމާ ގުޅޭ ގޮތުން ޕީއެންސީ އިން ބަހެއް ބުނެފައިނުވާއިރު، ޒިޔާދުގެ އިތުރުން ކުރީގެ ހެރިޓޭޖް މިނިސްޓްރީގެ ސްޓޭޓް މިނިސްޓަރު އަދި މަނަދޫ ދާއިރާގެ ކުރީގެ މެންބަރު މުހައްމަދު ތޯރިގު ވެސް ޕީއެންސީއަށް ވައްދާފައިވާ މައްސަލައެއް ވަނީ ފެންމަތިވެފައެވެ.
