ރާއްޖެއަށް ވައިގެ މަގުން މަސްތުވާތަކެތި އެތެރެކުރި ދިވެއްސަކު ހައްޔަރު ކޮށްފިއެވެ.
މި މައްސަލާގައި ހައްޔަރު ކޮށްފައިވަނީ ޏ. ފުވައްމުލަކަށް ނިސްބަތްވާ އުމުރުން 39 އަހަރުގެ ދިވެހި ފިރިހެނެކެވެ.
އޭނާގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް މިއަދު ހާޒިރު ކުރުމުން އޭނާގެ ބަންދަށް 15 ދުވަސްޖަހާފައިވާއިރު ކްރިމިނަލް ކޯޓުގެ ބަންދު އަމުރުގައިވާ ގޮތުން ޑްރަގް ފެނިފައިވަނީ އޭނާ ރާއްޖެ އައިއިރު، ގެނައި ދެ ލަގެޖުގެ އަތްގަނޑުގެ ދަށަށް ވާ ގޮތަށް އައްސާފައިވާ ކޮތަޅެއްގެ ތެރެއިންނެވެ.
މީގެ އިތުރުން މި އަމުރުގައި ބުނެފައިވަނީ ކޮތަޅުގެ ތެރެއިން ފެނުނު ޑްރަގްގެ ބަރުދަނުގައި 109 ގްރާމް ހުރި ކަމަށެވެ. ކަސްޓަމްސް އިން މި ތަކެތި ބަލައި ތަހުލީލު ކުރިއިރު، އެ ތަކެތި ހެރޮއިން އަށް ވަނީ ޕޮޒިޓިވްވެފައިވާކަމަށް ބަންދުގެ އަމުރުގައި ވަނީ ފާހަގަކޮށްފައެވެ.
ފުލުހުން ކޯޓުގައި ބުނެފައިވާ ގޮތުގައި އޭނާގެ ކުޑަކަމުދާތަކެތި ޓެސްޓު ކުރިއިރު މަސްތުވާތަކެއްޗަށް ޕޮޒިޓިވް ވެފައިވާ ކަމަށެވެ.
އެ މީހާއަކީ މަސްތުވާތަކެތީގެ ކުށުގެ ރެކޯޑު އޮތް މީހެކަން ފާހަގަކޮށްލެވެއެވެ.
