ފުޅާ ދާއިރާއެއްގައި ހަށިވިއްކުމުގެ ވިޔަފާރި ކުރިކަމުގެ ތުހުމަތުވާ ބިދޭސީ ދެ އަންހެނަކު ޑީޕޯޓް ކޮށްފިއެވެ.
ޑީޕޯޓް ކޮށްލާފައި ވަނީ ވިއެޓްނާމަށް ނިސްބަތްވާ އުމުރުން 41 އަހަރުގެ އަންހެނަކާއި އުމުރުން 40 އަހަރުގެ އަންހެނެކެވެ.
މޯލްޑިވްސް އިމިގްރޭޝަނުން ބުނީ ރާއްޖޭގައި ހަށިވިއްކުމުގެ ވިޔަފާރި ކުރަމުންދާކަމަށް ތުހުމަތުކުރެވޭ ބިދޭސީންނަށް އަމާޒުކޮށް އިމިގްރޭޝަނާއި ފުލުހުން ގުޅިގެން އޮޕަރޭޝަނެއް ކުރިއަށް ގެންދިޔަ ކަމަށެވެ.
އެ އޮޕަރޭޝަންގައި ފުޅާދާއިރާއެއްގައި ހަށިވިއްކުމުގެ ވިޔަފާރި ކުރަމުންދިއަ ބިދޭސީ ދެ އަންހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާ ކަމަށް އިމިގްރޭޝަނުން ވަނީ ބުނެފައެވެ.
އިތުރަށް އިމިގްރޭޝަނުން ބުނީ އޭގެ ތެރެއިން އެކަކަކީ ވޯކް ވިސާގައި ރާއްޖޭގައި އުޅެމުންދިއަ މީހެއް ކަމަށެވެ. އަދި ދެވަނަ މީހާއަކީ ޓޫރިސްޓު ވިސާގައި ރާއްޖެ އައިސްފައިވާ މީހެއް ކަމަށް އިމިގްރޭޝަނުން ވަނީ ބުނެފައެވެ.
އެ މައްސަލަ ތަހުގީގުކުރުމަށް ފަހު، އެ ދެ މީހުން ވެސް މިހާރު ވަނީ ޑީޕޯޓުކޮށްފައެވެ.
