ރާއްޖޭގެ އެކި ސަރަހައްދުތަކަށް މިދިޔަ ހުކުރު ދުވަހު ކުރި ގަދަ ވިއްސާރާގައި ހަމައެކަނި މާލޭގެ ގެތެކަށް ލިބުނު ގެއްލުމުގެ އަދަދު 2.2 މިލިއަން ރުފިޔާއަށް އަރާ ކަމަށް ނޭޝަނަލް ޑިޒާސްޓާ މެނޭޖްމެންޓް އޮތޯރިޓީ (އެންޑީއެމްއޭ) އިން ބުނެފިއެވެ.
އެ ދުވަހުގެ ފަތިހު މާލެއަށް ވާރޭ ވެހެން ފެށިގޮތަށް ވާރޭ ވެހުން މެދުކަނޑާލާފައި ވަނީ އެ ރޭގެ 7:30 ހާއިރުއެވެ.
އެއަށް ފަހު އެ ރޭގެ 10 ޖެހުމާ ހަމައަށް އައި އިރު ވެސް މާލޭގެ މަގުތަކުން ފެން ހިނދިފައެއް ނުވާއިރު އާންމުކޮށް މާލޭގައި ފެންބޮޑުވާ ސަރަހައްދުތަކުގައި ހުރި އެތައް ގެތަކަކާއި ފިހާރަތަކެއްގެ ތެރެއަށް ފެން ވަދެ އާންމުން އަމިއްލައަށް ފެން ހިންދުމަށް އާންމުންވެސް ނުކުމެ ވަނީ އެތައް މަސައްކަތެއް ކޮށްފައެވެ.
އެއާއެކު މާލެއާއި ރަށްރަށަށް ލިބުނު ގެއްލުންތަށް ވަޒަން ކުރުމަށް އެންޑީއެމްއޭއިން ހެދި އެސެސްމެންޓު ހަދާފައިވާއިރު މިއަދު ވަނީ އެސެސްމެންޓުގެ ތަފްސީލުތައް އާންމު ކޮށްފައެވެ.
އެންޑީއެންއޭއިން ހެދި އެސެސްމެންޓުން ފާހަގަކޮށްފައިވާ ކަންތައްތައް:
- މިއީ ފަހުގެ ތާރީހެއްގައި މާލެއަށް ރިކޯޑު މިންވަރަކަށް ވާރޭ ވެހުނު ދުވަހެއް (3 ގަޑިއިރު ތެރޭ 109.8 މިލިމީޓަރުގެ ވާރޭ ވެހުނު)
- އެކި ހިސާބުތަކުގައި ވެލި ބަސްތާ ޖެހުމަށް މާލޭ ސިޓީ ކައުންސިލަށް 20،000 ގޯނި ދޫކުރި
- މާލޭގެ އެކި ސަރަހައްދުތަކުގައި ފެންބޮޑުވެ އެކިއެކި އެހީތެރިކަމަށް އެދި 740 އަށްވުރެ ގިނަ ރިޕޯޓު ލިބުނު (ވިޔަފާރިތަކާއި، ސްކޫލު، ގުދަން ހިމެނޭ)
- އެ ދުވަހު ކައްކާ ކައިބޮއި ހެދުމަށާއި ޒަރޫރީ ބޭނުންތަކަށް ހުރަސް އެޅިގެން ރިޕޯޓުކުރި 53 ގެއެއްގެ ރެޕިޑް އެސެސްމެންޓު ހަދައި އާންމު ދިރިއުޅުމަށް ދަތިވި 27 ގޭބީސީއެއްގެ 226 މީހުންނަށް ވަގުތީ ބޯހިޔާވަހިކަމާއި ކެއުން ބުއިމުގެ އިންތިޒާމް ދެ ދުވަހަށް ހަމަޖައްސަދިން
- 115 ގެއެއްގެ އެސެސްމެންޓު ހަދާފައިވާއިރު އެކި ސަބަބު ތަކާހުރެ އެސެސްމެންޓު ނެހެދި 17 ތަނެއް ނުހެދޭ
- އުދަ އެރުމުގެ ސަބަބުން 2 ރަށެއް ރިޕޯޓު ކުރި (ރ. އިނގުރައިދޫ އަދި ށ. ނަރުދޫ)
- ފެންބޮޑުވެގެން 8 ރަށަކުން ރިޕޯޓުކުރި (ފ. ނިލަންދޫ، ދ. ކުޑަހުވަދޫ، ދ. މީދޫ، ފ. މަގޫދޫ، އދ. މާމިގިލި، ކ. ގުރައިދޫ، ފ. ފީއަލި އަދި ކ. ހިންމަފުށި) އޭގެ ތެރެއިން 4 ރަށެއްގެ 73 ގެއަކަށް އެކިވަރުގެ ގެއްލުންވެ ރިޕޯޓުކޮށްފައިވޭ
- ފެންބޮޑުވުމުގެ ހާދިސާގައި ހަމައެކަނި މާލޭގެ ގެތަކަށް ލިބުނު ގެއްލުމުގެ އަދަދު 2.2 މިލިއަން ރުފިޔާއަށް އަރާ (ގުދަންތަކާއި ވިޔަފާރިގެތައް ނު ހިމަނާ)
- އަތޮޅު ތެރޭ ރަށްރަށުގެ މީހުން ދިރިއުޅޭ ގެތަކަށް ލިބުނު ގެއްލުން 8 ލައްކައަށް އަރާ (ދަނޑު ބިންތަކާއި ވިޔަފާރިތައް ނުހިމަނާ)
- ފެންބޮޑުވުމުގެ އޮޕަރޭޝަނަށް 61،500 ރުފިޔާ ހަރަދުވި އަދި ރިލީފްގެ ގޮތުގައި ހާލުގައި ޖެހުނު ފަރާތްތަކަށް ކެއުން ބުއިމާއި ވަގުތީ ބޯހިޔާވަހިކަމަށް 2 ލައްކަ ރުފިޔާ ހަރަދުވި
މިއީ މިހާތަނަށް ހިންގުނު އެންމެ ބޮޑު އޮޕަރޭޝަންކަން ފާހަގަކޮށް އެންޑީއެމްއޭއިން ބުނީ، މި ހާދިސާގައި ގެއްލުން ލިބުނު މާލޭގެ ގެތަކުގެ އިތުރުން އަތޮޅުތަކުގެ ގެތަކަށް އެހީ ފޯރުކޯށްދިނުމުގެ މަސައްކަތް އެ އޮތޯރިޓީން ކުރަމުންދާ ކަމަށެވެ.
މިދިޔަ މަހުގެ 31 ވަނަ ދުވަހު މާލެއަށް ކުރި ވިއްސާރައިގައި ވެސް 11 ގެއަކުން 46 މީހަކަށް ވަގުތީ ބޯހިޔާވަހިކަން ފޯރުކޮށްދިނެވެ.
