ޗައިނާއަށް މިދިޔަ އަންގާރަ ދުވަހު އައި ބާރުގަދަ ބިންހެލުމާއި ގުޅިގެން ފޮރިން މިިސްޓަރު ޑރ. އަބްދުﷲ ހަލީލް ޗައިނާގެ ފޮރިން މިނިސްޓަރު ވަން ޔީއަށް ތައުޒިޔާ ވިދާޅުވެއްޖެއެވެ.
ފޮރިން މިިސްޓަރު ޑރ. އަބްދުﷲ ހަލީލް ގެ މެސެޖުގައި ޗައިނާގެ ޒީޒަން އޮޓޮނޮމަސް ރީޖަންގެ ޑިންގްރީ ކައުންޓީއަށް އައި ބިންހެލުމުގެ ސަބަބުން އެތައް ބައެއްގެ ފުރާނަ ގެއްލި، ގިނަ އަދަދެއްގެ މީހުންނަށް އަނިޔާވެ، މުދަލާއި އިންފްރާސްޓްރަކްޗަރަށް ގެއްލުން ލިބުނު ހަބަރު އަޑުއެހީ ނުހަނު ހިތާމައާއެކު ކަން ވަނީ ފާހަގަކުރައްވާފައެވެ.
އަދި ޑރ. ހަލީލް ވަނީ ދިވެހި ސަރުކާރާއި ދިވެހި ރައްޔިތުންގެ ފަރާތުން މި ބިންހެލުމުގައި ފުރާނަ ގެއްލުނު މީހުންގެ އާއިލާތަކަށާއި މި ކާރިސާގެ ސަބަބުން އަސަރުކުރި އެންމެހައި ފަރާތްތަކަށް ތައުޒިޔާ ވިދާޅުވެފައެވެ.
ޗައިނާގެ މި ސަރަހައްދަކީ ބިންހެލުންތައް އާންމުގޮތެއްގައި އަންނަ ސަރަހައްދެއް ނަމަވެސް އަންގާރަ ދުވަހު އައި ބިންހެލުމަކީ ފާއިތުވި 5 އަހަރުގެ ތެރޭގައި އެ ސަރަހައްދަށް ރެކޯޑް ކުރެވުނު އެންމެ ބާރުގަދަ ބިންހެލުން ކަމަށް ޗައިނާ އާތުކުއޭކް ނެޓްވޯކްސް ސެންޓަރު (ސީއީއެންސީ) އިން ވަނީ ބުނެފައެވެ.
މި ބިންހެލުން އައިސްފައިވަނީ އަންގާރަ ދުވަހު ޗައިނާގެ ގަޑިން 9:00 ހާއިރު ހިމާލަޔާ ފަރުބަދަ އަށެވެ. މި ބިންހެލުމުގައި އިއްޔެގެ 10 ޖެހުމާ ހަމައަށް 126 މީހުން މަރުވެ، 188 މީހުން ޒަހަމްވެފައިވާ ކަމަށް ޗައިނާގެ މީޑިއާތަކުގައި ވަނީ ރިޕޯޓުކޮށްފައެވެ.
އަންގާރަ ދުވަހު ޗައިނާއަށް އައި ބިންހެލުމަކީ 6.8 މެގްނިޓިއުޑްގެ ބާރުމިނުގައި އައި ބިންހެލުމެއް ކަމަށް ސީއީއެންސީ އިން ބުނެފައިވާއިރު އެމެރިކާގެ ޖިއޮލޮޖިކަލް ސާވޭއިން ބުނީ ބިންހެލުމުގެ ބާރުމިނަކީ 7.1 މެގްނިޓިއުޑް ކަމަށެވެ.
