ޓޫރިސްޓު ވުސާގައި ދިވެހިރާއްޖެއަށް އެތެރެވެ ވިޔަފާރި ހިންގަމުންދިޔަ 2 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަންގެ ބެލުމުގެ ދަށަށް ގެންގޮސްފައި ވަނީ ސީރިއާއަށް ނިސްބަތްވާ އުމުރުން 19 އީމާން ކަރަމަން އަދި ޖޯޑަންއަށް ނިސްބަތްވާ އުމުރުން 24 އަހަރުގެ ރާބީ ހައިތަމް އަހްމަދު ޖުމާހް އެވެ.
އިމިގްރޭޝަނުން ބުނީ އެ 2 މީހުން އިމިގްރޭޝަންގެ ބެލުމުގެ ދަށަށް ގެންގޮސްފައި ވަނީ އާންމުން ހުށަހެޅި ކަންބޮޑުވުންތަކާއި ގުޅިގެން ކަމަށެވެ.
އެގޮތުން އިމިގްރޭޝަންއިން ބެލިބެލުމުން އެ 2 މީހުންނަކީ ޓޫރިސްޓް ވިސާގައި ރާއްޖެ އެތެރެވެގެން އުޅޭ 2 މީހުންކަން އެނގިފައިވާ ކަމަށް އިމިގްރޭޝަނުން ބުނެއެވެެ. އަދި އެ މީހުން އައި ޓޫރިސްޓް ވިސާއާ ހިލާފުވެ ރާއްޖޭގައި ވިޔަފާރިކޮށް، އާންމު ތަންތަނުގައި ދިރިއުޅެމުންދިޔަ 2 މީހުން ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން ބުނީ އެ 2 މީހުން ޑީޕޯޓް ކުރުމުގެ މަސައްކަތް ކުރަމުންދާ ކަމަށެވެ. އަދި ގަވާއިދާ ހިލާފަށް އުޅުމުންދާ މިފަދަ ބިދޭސީންގެ މައްސަލަތައް "އިމިގްރޭޝަން ވޮޗް" މެދުވެރިކޮށް ރިޕޯޓްކުރުމަށް ވެސް އިމިގްރޭޝަނުން ވަނީ ބުނެފައެވެ.
