ގިނަ އަދަދެއްގެ ފަތުރުވެރިންނާއެކު ދެ ކްރޫޒް ޝިޕް މާލެއަށް ބަނދަރު ކޮށްފައިވާއިރު، މި ކްރޫޒް ޝިޕްތަކުން 4000 އަށް ވުރެ ގިނަ ފަތުރުވެރިންނަށް އިމިގްރޭޝަނުން ކްލިއަރެންސް ދީފިއެވެ.
އިމިގްރޭޝަނުން ބުނީ މާލޭގައި ބަނދަރުކޮށްފައިވާ 2 ކްރޫޒްގެ ތެރެއިން، ފުރަތަމަ ކްރޫޒް ޝިޕް އެމްއެސް ނޯވީޖިއަން ސްކައި އިން 1870 ޕެސެންޖަރުންނަށާއި، 862 ކްރޫއިންނަށް ކްލިއަރެންސް ދީފައިވާ ކަމަށެވެ. ދެވަނައަށް އައި ކްރޫޒް ޝިޕް، އެމްއެސް ރިވިއޭރާ އިން 1،179 ފަތުރުވެރިންނާއި 747 ކްރޫއިންނަށް ކްލިއަރެންސް ދީފައިވާ ކަމަށް އިމިގްރޭޝަނުން ވަނީ ބުނެފައެވެ.
ޑިސެމްބަރު 23 އިން ފެށިގެން 30 އާ ދެމެދު ސީޝެލްސްގެ މަހޭއިން ރޫޓް ކްލިއަރެންސް ޕްރޮސެސް ކާމިޔާބުކަމާއެކު ސީޕޯޓް ޑިވިޝަންގެ އޮފިސަރުން ކުރިއަށް ގެންގޮސްފައި ކަމަށް އިމިގްރޭޝަނުން ވަނީ ބުނެފައެވެ.
މި ދެ ކްރޫޒް ޝިޕް ރާއްޖޭގައި 2 ދުވަސް ހޭދަ ކުރާނެ ކަމަށް މޯލްޑިވްސް އެސޯސިއޭޝަން ފޯ ޔޮޓް އޭޖެންޓްސް (މާޔާ) އިން ބުނާ އިރު، މި ދެ ކްރޫޒް ވެސް ރާއްޖެ އައީ ސީޝެލްސްއިންނެވެ.
މާޔާއިން ބުނީ، ފަތުރުވެރިކަމުގެ ހައި ސީޒަން ފެށުނު ފަހުން މިހާރު ރާއްޖެއަށް 3 ކްރޫޒް ޝިޕް އައިސްފައިވާ ކަމަށެވެ. އަދި ޖެނުއަރީ މަހު އިތުރު އެއް ކްރޫޒް ޝިޕް އައުމަށް ހަމަޖެހިފައިވާ ކަމަށާއި ހައި ސީޒަން ނިމުމުގެ ކުރިން އިތުރު 12 ކްރޫޒް ޝިޕް ރާއްޖެ އައުމަށް ތާވަލްކޮށްފައިވާ ކަމަށެވެ.
ފާހަގަކޮށްލެވޭ ގޮތުގައި މި އަހަރު ވަނީ ފަތުރުވެރިކަމުގެ ސިނާއަތުގެ އަމާޒުގެ ތެރެއިން ދެ މިލިއަން ފަތުރުވެރިންގެ އަމާޒަށްވެސް ވާސިލުވެފައެވެ. ރާއްޖެ އައި 2 މިލިއަން ވަނަ ފަތުރުވެރިއަކީ ފިރިމީހާ އާއި ދެ ކުދިންނާ އެކު އައި އޮސްޓްރިއާގެ އަންހެނެކެވެ. މި އާއިލާ އަށް ސާއި ލެގޫން މޯލްޑިވްސް ރިސޯޓުގައި 6 ދުވަހުގެ ޕެކޭޖެއް ވަނީ ހަދިޔާއެއްގެ ގޮތުގައި ދީފައެވެ.
މިނިސްޓްރީން އާންމުކުރި އެންމެ ފަހުގެ ތަފާސްހިސާބު ތަކުން ދައްކާ ގޮތުގައި ނިމިދިޔަ ޑިސެމްބަރު މަހުގެ 23 ވަނަ ދުވަހުގެ ނިޔަލަށް ރާއްޖެއަށް ވަނީ ޖުމްލަ 1،985،800 ފަތުރުވެރިން އައިސްފައެވެ. މިދިޔަ އަހަރު މި މުއްދަތާ ހަމައަށް ރާއްޖެއަށް އައިސްފައި ވާ ފަތުރުވެރިންގެ އަދަދަކީ 1،821،339 ކަމަށްވާ އިރު، 2022 ވަނަ އަހަރު މި މުއްދަތުގައި ވަނީ 1،620،215 ފަތުރުވެރިން އައިސްފައެވެ.
