2004 ވަނަ އަހަރުގެ ސުނާމީއަށް 20 އަހަރު ފުރުން ފާހަގަކުރުމަށް ބާއްވާ 'ވިލުންތެރި 20 - ސުނާމީއަށް ފަހު ރާއްޖެ' މައުރަޒުގެ ޑިޖިޓަލް ޕާޓްނަރެއްގެ ގޮތުގައި އުރީދޫ މޯލްޑިވްސްއިން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ) އަދި ޔުނައިޓެޑް ނޭޝަންސް އޮފީސް ފޯ ޑިޒާސްޓާ ރިސްކް ރިޑަކްޝަން (ޔޫއެންޑީއާރްއާރް) އާ ބައިވެރިވެއްޖެއެވެ.
ނޭޝަނަލް އާޓް ގެލެރީގައި މިހާރު ކުރިއަށްދާ މި މައުރަޒުގައި ޑިޖިޓަލް ޕާޓްނަރެއްގެ ގޮތުގައި އުރީދޫ މޯލްޑިވސްއިން ބައިވެރިފައި ވާއިރު އުރީދޫ މޯލްޑިވްސްއަކީ ރާއްޖެއަށް ދިމާވާ މިފަދަ ކާރިސާތަކުގައި އެހީތެރިކަން ފޯރުކޮށްދޭން އެންމެ ކުރީސަފުގައި ނިކުންނަ އެއް ކުންފުނިކަން ފާހަގަކޮށްލެވެ.
އޫރީދޫ މޯލްޑިވްސް އިން ވަނީ ކާރިސާތަކަށް އިޖާބަދިނުމާއި ދުރާލާ ތައްޔާރުވުމުގައި ނަމޫނާ ދައްކުވައިދީ، ގައުމަށް ދިމާވާ ކުއްލި ނުރައްކަލުގެ ހާލަތްތަކުގައި މުހިންމު ދައުރެއް އަދާކޮށްފައެވެ. ކުންފުނިން އަޅާ އަވަސް ފިޔަވަޅުތަކާއި ސްޓްރެޓީޖިކް ޕާޓްނާޝިޕްތަކުގެ ސަބަބުން ގައުމުގެ ވިލުންތެރިކަން އިތުރުކުރުމުގެ މަސައްކަތުގައި އުރީދޫއަކީ މުހިންމު ބައިވެރިއެކެވެ.
އެގޮތުން ބަލާއިރު 2014 ވަނަ އަހަރު މާލޭގައި ކުރިމަތިވި ފެނުގެ ހާދިސާއަށް އަވަސް އިޖާބައެއްދީ އޫރީދޫއިން ވަނީ ކުއްލި ނުރައްކަލުގެ ހާލަތުގައި ބޭނުންވާ ޓެލެކޮމިއުނިކޭޝަންގެ އެހީތެރިކަމާއި ހިލޭ އެސްއެމްއެސް އެލާޓްތަކާއި އިންޓާނެޓް ހިދުމަތްތައް ފޯރުކޮށްދީފައެވެ.
މީގެއިތުރުން ކޮވިޑް-19 ޕެންޑެމިކާއި ގުޅިގެން ވެސް އުރީދޫއިން ވަނީ އަވަސް ފިޔަވަޅުތަކެއް އަޅައި އެހީތެރިކަން ފޯރުކޮށްދީފައެވެ. 48 ގަޑިއިރުގެ ތެރޭގައި އޫރީދޫގެ މުވައްޒަފުންގެ 85 އިންސައްތަ ގޭގައި ތިބެގެން މަސައްކަތްކުރުމަށް ބަދަލުކޮށް، މުވައްޒަފުންގެ ރައްކާތެރިކަން ކަށަވަރުކޮށް ކަސްޓަމަރުންނަށް މެދުނުކެނޑި ހިދުމަތް އުރީދޫއިން ކަށަވަރުކޮށްދިނެވެ.
ކޮވިޑް-19 އާއި ދެކޮޅަށް ރާއްޖެއިން ކުރަމުންދިޔަ މަސައްކަތަށް އެއްބާރުލުން ދިނުމުގެ ގޮތުން އުރީދޫއިން ވަނީ 2.5 މިލިއަން ރުފިޔާގެ އެހީތެރިކަން ފޯރުކޮށްދީފައެވެ. އަދި އުރީދޫއިން އިންޓަނެޓް ކަނެކްޝަންގެ އެހީތެރިކަމާއި ކޮވިޑް-19 އާއި ގުޅޭ ހޭލުންތެރިކަމުގެ މައުލޫމާތު އާންމުންނަށް ފޯރުކޮށްދިނުމާއި އޮންލައިންކޮށް ކިޔަވާދިނުމަށާއި ސިއްހީ ދާއިރާ އަދި ވިޔަފާރިތަކަށް ބޭނުންވާ ޑިޖިޓަލް ހިދުމަތްތައް ފޯރުކޮށްދީފައިވެއެވެ.
އޫރީދޫއިން ވަނީ ގައުމުގެ ސިއްހީ ހިދުމަތުގެ ވަސީލަތްތައް ހަރުދަނާކުރުމަށް ވެސް އެހީތެރިކަން ފޯރުކޮށްދީފައެވެ. އެގޮތުން އެއާ އެމްބިއުލަންސް އިކުއިޕްމަންޓަށް 16 މިލިއަން ރުފިޔާ އިންވެސްޓްކުރުމާއި ދިވެހި ސަރުކާރަށް 3 ސީ އެމްބިއުލަންސް ހަދިޔާކޮށްފައިވެއެވެ.
އުރީދޫއިން ވަނީ ވިލުންތެރި ދިވެހިރާއްޖެއެއް ބިނާކުރުމަށް ކުރެވޭ މަސައްކަތުގައި ދިވެހިރާއްޖޭގެ މުއައްސަސާތަކާއެކު ބައިވެރިވެ ކުރިއަށް އޮތްތަނުގައި ވެސް އުރީދޫއިން ދެމި އޮންނާނެކަމުގެ ޔަގީންކަން ދީފައެވެ. ކާރިސާތަކަށް ތައްޔާރުވެ، ކާރިސާތަކުގެ އަސަރު ކުޑަކުރުމަށް ހޭލުންތެރިކުރުމާއި މުހިންމު ސްޓޭކްހޯލްޑަރުންނާ އެކު ޕާޓްނާވެ، ޑިޒާސްޓާ އެލާޓްތަކާއި ކުއްލި މުއާމަލާތްތަކަށް ޓެކްނޮލޮޖީގެ ހައްލުތައް ކުރިއެރުވުމަށް މަސައްކަތް ކުރާނެ ކަމުގެ ޔަގީންކަން ވެސް އުރީދޫއިން ވަނީ ދީފައެވެ.
