އިންޑިއާގެ ކުރީގެ ބޮޑުވަޒީރު ޑރ. މަންމޯހަން ސިންގް އުމުރުފުޅުން 92 އަހަރުގައި އަވަހާރަވެއްޖެއެވެ.
މަންމޯހަން ސިންގް އަވަހާރަވީ މިއަދު ސިއްހީ ހާލުކޮޅު ކުއްލިއަކަށް ގޯސްވުމާ ގުޅިގެން ނިއު ދިއްލީގެ އޯލް އިންޑިއާ އިންސްޓިޓިއުޓް އޮފް މެޑިކަލް ސައިންސަސް (އެއިމްސް) ގައި އެޑްމިޓްކޮށް ފަރުވާދެމުން ދަނިކޮށެވެ. އޭނާގެ ސިއްހީ ހާލަތު ގޯސްވީ ގޭގައި ކުއްލިއަކަށް ހޭނެތިގެން ކަމަށް ހޮސްޕިޓަލުން ނެރުނު ބަޔާނެއްގައި ބުނެފައިވެއެވެ.
އިންޑިއާގެ 14 ވަނަ ބޮޑުވަޒީރު ކަމަށްވާ އިންތިހާބުވި މަންމޯހަން ސިންގް ވަނީ 2004 ވަނަ އަހަރުން ފެށިގެން 2014 ވަނަ އަހަރާ ހަމައަށް އިންޑިއާގެ ބޮޑުވަޒީރުކަން ކުރައްވައިފައެވެ. އިންޑިއާގެ ބޮޑުވަޒީރުކަން އެންމެ ގިނަ ދުވަސްވަންދެން ކުރެއްވި މަންމޯހަން ސިންގް އާއި ގުޅޭ ގޮތުން 2014 ވަނަ އަހަރު ސިންގްގެ ފަހަން ވެރިކަމަށް ވަޑައިގެންނެވި ބޮޑުވަޒީރު ނަރެންދްރަ މޯދީ ވިދާޅުވީ އޭނަކީ ނިކަމެތި ނަސްލަކުން ތެދުވެ، އިގްތިސާދީ ސިޔާސަތުގައި އަހަރުތަކުގެ ތެރޭގައި ވަރުގަދަ އަސަރެއް ދޫކޮށްލި އިންޑިއާގެ އެންމެ ޝަރަފުވެރި ލީޑަރުންގެ ތެރޭގައި ހިމެނޭ ބޭފުޅެއް ކަމަށް ވިދާޅުވެފައެވެ.
މަންމޯހަން ސިންގް އަވަހާރަވުމާއި ގުޅިގެން އެކަމުގެ ހިތާމައިގައި ބައިވެރިވެ މޯދީ އިތުރަށް ވިދާޅުވީ ސަރުކާރުގެ އެކިއެކި މަގާމުތައްކަމުގައިވާ، ފިނޭންސް މިނިސްޓަރުކަންވެސްކުރައްވާފައިވާ މަންމޯހަން ސިންގްގެ އިގްތިސާދީ ސިޔާސަތުގައި މިދިޔަ އަހަރުތަކުގެ ތެރޭގައި ވަރުގަދަ އަސަރެއް ކުރުވި ކަމަށެވެ. އަނި މަޖިލީހުގައި އޭނާ ކުރެއްވި އިންޓަވެންޝަންތަކަކީ ވެސް ވިސްނުންތޫނު ކަންތައްތަކެއްކަން މޯދީ ވަނީ ފާހަގަކުރައްވާފައެވެ.
