ހުޅުމާލޭގައި ގަވައިދާ ހިލާފަށް ވެހިކަލް ދޮވެ ސާފުކުރި ބިދޭސީންތަކެއް އަތުލައިގެންފިއެވެ.
އިމިގްރޭޝަނުން ބުނީ އިއްޔެ ހުޅުމާލެ ފޭސް 1 އަދި 2 ގެ އެކި ސަރަހައްދުތަކުގައި ގަވައިދާ ހިލާފަށް ވެހިކަލް ދޮވެ ސާފުކުރުމުގެ މަސައްކަތް ކުރަމުންދާ ބިދޭސީންނަށް އަމާޒުކޮށް ރެއިޑު އޮޕަރޭޝަނެއް ހިންގި ކަމަށާއި މި އޮޕަރޭޝަންގައި 8 ބިދޭސީއަކު އިމިގްރޭޝަނުގެ ބެލުމުގެ ދަށަށް ގެނެސްފައިވާ ކަމަށެވެ.
އިމިގްރޭޝަނުން ވަނީ މިއަދު ހެނދުނުވެސް ބޮޑު ރެއިޑް އޮޕަރޭޝަނެއް މާލޭގެ ލޯކަލް މާރުކޭޓު ސަރަހައްދުގައި ފަތިހުން ފެށިގެން މެންދުރާއި ހަމައަށް ކުރިއަށް ގެންގޮސްފައެވެ.
އިމިގްރޭޝަނުން ބުނީ މި ރެއިޑު އޮޕަރޭޝަންގައި އެ ސަރަހައްދުގައި އަޅާފައިވާ އުޅަނދު ފަހަރާއި އެ ސަރަހައްދުން ލަފާ ފުރާ އުޅަނދުފަހަރު ވެސް ބަލާ ފާސްކޮށްފައިވާ ކަމަށާއި، އެގޮތުން ޖުމްލަ 148 ބިދޭސީން ބަލާ ފާސްކޮށްފައިވާ ކަމަށެވެ. މި މީހުންގެ ތެރެއިން ގަވައިދާ ހިލާފަށް އުޅޭ ބިދޭސީ 22 ފިރިހެނަކާއި 1 އަންހެނަކު އިމިގްރޭޝަންގެ ބެލުމުގެ ދަށަށް ގެނެސްފައިވާކަމަށް އިމިގްރޭޝަނުން ވަނީ ބުނެފައެވެ.
ގަވައިދާ ހިލާފަށް އުޅެމުންދާ ބިދޭސީންގެ މައްސަލަ ހައްލު ކުރުމަށް އިމިގްރޭޝަނުން އަންނަނީ ގިނަ އޮޕަރޭޝަންތަކެއް ހިންގަމުންނެވެ. އިމިގްރޭޝަނުން މީގެ ކުރިން ވަނީ، މި އަހަރުގެ އަމާޒަކީ ގަވާއިދާ ހިލާފަށް އުޅޭ 5،000 ބިދޭސީން ފޮނުވައިލުން ކަމަށާއި އެ އަމާޒަށް މިހާރު ވާސިލުވެފައިވާ ކަމަށް ބުނެފައެވެ.
މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުމެވެ.
