ހައުސިން ޑިވެލޮޕްމެންޓް ކޯޕަރޭޝަން (އެޗްޑީސީ) ޑިރެކްޓަރުންގެ ބޯޑު މެންބަރުންގެ ސަސްޕެންޝަން އުވާލައިފިއެވެ.
ބިންވެރިޔާ ސްކީމްގެ ދަށުން ގޯތި ނުލިބޭ ބަޔަކަށް، ވެރިފައި ކުރުމެއް ނެތި ގޯތި ދޫކޮށްފައިވާކަމަށް ތުހުމަތު ކުރެވޭ މައްސަލައަކާ ގުޅިގެން އެޗްޑީސީގެ ޑިރެކްޓަރުން ބޯޑު މެންބަރުން ސަސްޕެންޑުކޮށްފައި ވަނީ މިދިޔަ ބުރާސްފަތި ދުވަހުއެވެ.
އެޗްޑީސީގެ ޑިރެކްޓަރުން ބޯޑުގެ މެންބަރުން ސަސްޕެންޑް ކޮށްފައި ވަނީ ފުލުހުން ބަލަމުން އަންނަ މި މައްސަލައިގެ ތަހުގީގަށް ޖާގަދީ، ފުރިހަމަ އެހީތެރިކަން ދިނުމަށް ކަމަށް ޕްރައިވަޓައިޒޭޝަން ކޯޕަރޭޝަން ބޯޑު (ޕީސީބީ)އިން ވަނީ ބުނެފައެވެ. މި މައްސަލައާ ގުޅިގެން ކުންފުނީގެ ޗެއާމަން އަހުމަދު ނާސިފް ފިޔަވައި ޑިރެކްޓަރުންގެ ބޯޑުގެ ހުރިހާ މެންބަރުން ވަނީ ސަސްޕެންޑް ކޮށްފައެވެ.
އޭރު އެޗްޑީސީގެ މެނޭޖިން ޑިރެކްޓަރުގެ މަގާމުގައި ހުންނެވި އިބްރާހިމް ފަޒުލް ރަޝީދު ވެސް ސަސްޕެންޑްކޮށްފައި ވާއިރު، ފަޒުލް ވަނީ މަގާމުން އިސްތިއުފާދެއްވާފައެެވެ. އަދި މިދިޔަ އާދީއްތަ ދުވަހު އެޗްޑީސީގެ އެމްޑީގެ މަގާމަށް ކުރީގެ ކޮންސްޓްރަކްޝަން މިނިސްޓަރު މައުރޫފް ޖަމީލް ވަނީ އައްޔަންކޮށްފައެވެ.
ޕީސީބީއިން މިއަދު ބުނީ އެޗްޑީސީއަށް އާ މެނޭޖިން ޑިރެކްޓަރެއް އައްޔަންކޮށްފައިވާތީ، އެ ކޯޕަރޭޝަންގެ ޑިރެކްޓަރުންގެ ބޯޑުގެ މެންބަރުން ސަސްޕެންޑް ކުރުމަށް ނިންމި ނިންމުން މިއަދުން ފެށިގެން ނިމުމަކަށް ގެނެސްފައިވާ ކަމަށެވެ.
