ކޮންސްޓްރަކްޝަން މަސައްކަތަކަށް އިންޑިއާއިން ރާއްޖެ ގެނައި 40 މީހަކު ހާލުގައި ޖެހިފައިވާކަމަށް ބުނާ މައްސަލައެއް ފެންމަތިވެއްޖެއެވެ.
ރާއްޖޭގައި ތިބެ، ހާލުގައި ޖެހިފައިވާކަމަށް ބުނާ ބައެއްގެ ވީޑިއޯއެއް އިއްޔެވަނީ އިންޑިއާގެ ނޫސްތަކުގައި އާންމުކޮށްފައެވެ. އެމީހުން ދައްކާފައިވާ ވާހަކަތައް ފެންނަ ވީޑިއޯ، މިހާރު ސޯޝަލް މީޑިއާގައި ދައުރުވަމުން އަންނައިރު އެމީހުންވަނީ އެބުރި ގައުމަށް ދިއުމަށް އިންޑިއާ ސަރުކާރުގެ އެހީއަށް އެދިފައެވެ.
އެ ވީޑިއޯގައި ވާހަކަދައްކި މީހާވަނީ، އެމީހުން ރާއްޖެ އައީ ދިވެހި އަމިއްލަ ކުންފުންޏަކުން އިމާރާތެއް އެޅުމަށްޓަކައިކަމަށް ބުނެފައެވެ. އެޖެންޓެއް މެދުވެރިކޮށް އެ އެންމެން ރާއްޖެ ގެނައި ޖޫން، ޖުލައި ތެރޭގައިކަމަށް އެމީހާ ވަނީ ބުނެފައެވެ.
އެމީހުންނާ ހަވާލާދީ ޓައިމްސް އޮފް އިންޑިއާއިން ބުނީ ރާއްޖެ ގެނައިއިރު އެ މީހުންނަށް ރަނގަޅު މުސާރައެއް ދޭނެކަމަށް ބުނިނަމަވެސް އެ މީހުންނަށް މިހާރު މުސާރަ ނުދޭތާ އެތައް މަހެއް ވެފައިވާކަމަށެވެ. އަދި އެ ކަމާ ދެކޮޅަށް އަޑުއުފުލުމުން ކުންފުނިން އެ މީހުންނަށް ބިރު ދައްކައި، އެ އެންމެން އެކޮމޮޑޭޝަން ތެރޭގައި ބަންދުކޮށްފައިވާކަމަށް އެ މީހުން ވަނީ ބުނެފައެވެ. އަދި އެ ތަނުން ކަރަންޓު ވެސް ކަނޑައިލައިފައިވާކަމަށް އެމީހުން ވަނި ބުނެފައެވެ.
މި މައްސަލައާއި ގުޅިގެން އަދި މިހާތަނަށް ރާއްޖޭގެ ކަމާއި ގުޅޭ އެއްވެސް އިދާރާއަކުން މައުލޫމާތު ހިއްސާކޮށްފައެއް ނުވެއެވެ.
