އާންމު ސިއްހަތަށް ނުރައްކާވާ ގޮތަށް ނުތާހިރުކޮށް އޮތް ގެއެއްގެ ތެރޭގައި ކާބޯތަކެތި އުފައްދާ ބިދޭސީއަކު އަތުލައިގެންފިއެވެ.
އިމިގްރޭޝަން އިން ބުނީ، އެ އިދާރާއަށް ލިބުނު ރިޕޯޓަކާއި ގުޅިގެން ރޭ ޓާސްކުފޯހުން ވަނީ މާލޭގެ ހެންވޭރުގައި ހުންނަ ގެއެއް ބަލައި ފާސްކޮށްފައި ކަމަށެވެ. އެ ތަނަކީ އާންމު މިންގަނޑުތަކާއި ހިލާފަށް ދިވެހި އުފެއްދުންތައް ވިޔަފާރީގެ ބޭނުމަށް ތައްޔާރުކުރަމުންދާ ތަނެއް ކަމަށް ވެސް އިމިގްރޭޝަނުން ބުނެފައި ވެއެވެ.
އެ ތަނުން ވަނީ ފިހާރަތަކުން އާންމުކޮށް ލިބެން ހުންނަ ގިނަ ބާވަތްތަކުގެ ކާބޯތަކެތި ފެނިފައި ކަމަށާއި ގަވާއިދާ ހިލާފަށް މި މަސައްކަތް ކުރަމުން ދިޔަ ބިދޭސީ މީހާ މިހާރު ވަނީ އިމިގްރޭޝަންގެ ބެލުމުގެ ދަށަށް ގެންގޮސްފައި ކަމަށް އިމިގްރޭޝަނުން ބުނެއެވެ.
އެތަނުގެ ބައެއް ފޮޓޯތައް އިމިގްރޭޝަނުން އާންމުކޮށްފައިވާ އިރު، ޕެކެޓް ޕެކެޓްގައި ބަންދުކޮށްފައި ހުރި ތަކެތި ވެސް ފެންނަން ހުރެއެވެ. އަދި އެތަނުގައި ފޯއް ކޮށާ މެޝިނަކުން ފޯއް ކޮށާފައި ހުރި މަންޒަރު ވެސް ފެނެއެވެ. ނުތާހިރުކޮށް ހުރި ފާހާނާއެއް ވެސް ފެންނަ އިރު، އެތަނުން ފެނުނު ލޭބަލް ތަކެއް ވެސް އިމިގްރޭޝަނުން ވަނީ އާންމުކޮށްފައެވެ.
އެއީ އޮރެންޖް ކުލައިގެ ކަރުދާހު ޕްރިންޓްކޮށްފައިވާ ލޭބަލްތަކެކެވެ. އެ ލޭބަލްގައި ޖަހާފައި ވަނީ މިކްސް ޕްރޮޑަކްޓްގެ ފޮނި ފޯއް ކަމަށެވެ. އަދި އެކްސްޕަޔަރީ ޑެޓަކީ އަންނަ ފެބްރުއަރީ މަހުގެ 18 ކަމަށް ޖަހާފައި ވެއެވެ.
