މިދިޔަ ބުދަ ދުވަހުގެރޭ ކުރި އިހްތިޖާޖާ ގުޅިގެން ހައްޔަރުކުރި ދެ ޓެކްސީ ޑްރައިވަރުން ޝަރުތުތަކާ އެކީ ދޫކޮށްލައިފިއެވެ.
ޓެކްސީ ޑްރައިވަރުން މިދިޔަ ބުދަ ދުވަހު ހުޅުމާލޭގައި އިހްތިޖާޖުކުރީ ސަރުކާރުން ޓެކްސީގެ ހިދުމަތް ފަށަން އުޅޭތީ ނުރުހުން ފާޅުކުރުމުގެ ގޮތުންނެވެ.
މި އިހްތިޖާޖާ ގުޅިގެން ފުލުހުން ވަނީ ޖުމްލަ ހަތަރު ޑްރައިވަރަކު ހައްޔަރުކޮށްފައެވެ. އެއީ:
- މުހައްމަދު ޝާމިން، މއ. ވިރާހު (30އ)
- އަހްމަދު ޝަބީން، ސަންރޭ / ލ. ދަނބިދޫ (33އ)
- ނުއުމާން އަހްމަދު، ހޮލިޑޭވިލެޖް / ހދ. ކުމުންދޫ (36އ)
- މިސްބާހު ޝަރީފް، މއ. ނަހީދީމަންޒިލް (31އ)
މި ހަތަރު ޑްރައިވަރުންގެ ތެރެއިން މިސްބާހު ހައްޔަރުކުރީ ހޮނިހިރު ދުވަހުގައެވެ. މީގެ އިތުރުން އެއް މަސްދުވަހުގެ މުއްދަތަކަށް 22 ޓެކްސީ އެއް ޓޯކޮށްފައި ވެސް ވެއެވެ. ކޮންމެ ޑްރައިވަރެއް ވެސް ބަންދުކުރީ ފަސް ދުވަހުގެ މުއްދަތަކަށެވެ.
މީޑިއާ އާ ހިއްސާކުރި މައުލޫމާތުގައި ފުލުހުން ބުނީ، ބަންދުގެ މުއްދަތު ހަމަވުމުން ބަންދުގެ މުއްދަތު އިތުރުކުރުމަށް ހުޅުމާލެ މެޖިސްޓްރޭޓް ކޯޓަށް ޝަބީނާއި ޝާމިން ހާޒިރުކުރުމުން، ދެ މީހުން އުޅޭ ތަން ގަވައިދުން އެންގުމަށާއި އެއްބާރުލުން ދިނުމަށް ޝަރުތުކޮށް ދެ މީހުން ދޫކޮށްލާފައިވާ ކަމަށެވެ. މި ދެ މީހުންގެ އިތުރުން ނުއުމާން ވަނީ ޝަރުތުތަކާ އެކު މީގެ ކުރިން ދޫކޮށްލައިފައެވެ.
މިކަމާ ގުޅިގެން ރޭ ނެރުނު ބަޔާނެއްގައި ޑްރައިވަރުންގެ ޖަމިއްޔާއިން ބުނީ:
- ޓޯ ކުރި ގިނަ ކާރުތައް އިހްތިޖާޖުގައި ބައިވެރިނުވާ ކަމަށް
- ކާރު ހިފެހެއްޓި ސަބަބު ބައެއް ޑްރައިވަރުންނަށް ފުލުހުން ނާންގާ ކަމަށް
- ޓެކްސީގެ ހިދުމަތް ދިނުމަށް ޑްރައިވަރުން ހުށަހެޅި ކަންކަމަށް ސަރުކާރުން އިޖާބަ ދީފައި ނުވާ ކަމަށް
- ހައްޔަރުކުރި ޑްރައިވަރުންނާއި ޓޯ ކުރި ކާރުތައް ދޫކޮށްލަންދެން އިހްތިޖާޖު ކުރިއަށް ދާނެ ކަމަށް
ސިނަމާލެ ބްރިޖް ކައިރީގައި ހިނގި ކަންކަމާ ގުޅޭ ގޮތުން އެ ޖަމިއްޔާ އިން ބުނީ، އިހްތިޖާޖު ނިންމާލައި ޑްރައިވަރުން ގެއަށް ދިޔަ މަގުމަތީގައި ފުލުހުން އަމަލުކުރި ގޮތުން ހައިވޭ އާ ދިމާލުން ޓްރެފިކަށް ބާރު ބޮޑުވި ކަމަށާއި، އެކަމުގެ ސަބަބުން އާންމުންނަށް ދަތިތަކާ ކުރިމަތިލާން ޖެހުނު ކަމަށެވެ. އަދި އާންމުންނަށް ދަތިކޮށް މަގު ބަންދުކުރުމަށް ހިތްވަރު ނުދޭނެ ކަމަށް ވެސް ޑްރައިވަރުންގެ ޖަމިއްޔާއިން ބުނެފައި ވެއެވެ.
