އިމިގްރޭޝަންގެ ގާނޫނާ ހިލާފަށް 12 އަހަރު ވިސާނެތި ރާއްޖޭގައި އުޅެމުންދާ ފްރާންސްގެ އާއިލާއެއް ފުރުވާލަން ނިންމާފައިވާ ކަމަށް އިމިގްރޭޝަނުން ބުނެފިއެވެ.

އިމިގްރޭޝަން ކޮންޓްރޯލާ މުހައްމަދު ޝަމްއާން ވިދާޅުވީ އިމިގްރޭޝަންގެ ގާނޫނާ ހިލާފަށް ފްރާންސަށް ނިސްބަތްވާ 6 މީހުންގެ އާއިލާއެއް ރާއްޖޭގައި ދިރިއުޅެމުންދާ ކަމުގެ މައުލޫމާތުއިމިގްރޭޝަން ވޮޗް އަށް ޖުލައި މަހުގެ 18 ވަނަ ދުވަހު ލިބިފައިވާ ކަމަށެވެ.

ޝަމްއާން ވިދާޅުވީ އެ މައްސަލަ ބެލުމަށްފަހު އޮކްޓޫބަރު 23 ވަނަ ދުވަހު އެ މައްސަލާގައި ހިމެނޭ އިސް ފަރާތް އިމިގްރޭޝަނަށް ހާޒިރު ކުރި ކަމަށެވެ. އަދި އެ ފަރާތްތަކުގެ ޕާސްޕޯޓު މުއްދަތު ހަމަވެފައިވާކަމަށާއި، އެހެންކަމުން އެ އާއިލާ ރާއްޖެއިން ފުރުވާލުމަށް ބޭނުންވާ ޓްރެވަލް ޑޮކިއުމަންޓު ހޯދުމުގެ މަސައްކަތް ފޮރިން މިނިސްޓްރީއާ ގުޅިގެން ކުރަމުން ދާ ކަމަށްވެސް ޝަމްއާން ވަނީ ވިދާޅުވެފައެވެ.

ޝަމްއާން އިތުރަށް ވިދާޅުވީ އިމިގްރޭޝަން ގާނޫނާ ހިލާފަށް ރާއްޖޭގައި އުޅުމަށް އެއްވެސް ފަރާތަކަށް ފުރުސަތު ނުދެއްވާނެ ކަމަށާއި، މި ފަރާތްތަކުގެ ޓްރެވަލް ޑޮކިއުމަންޓް ލިބުނުހާ އަވަހަކަށް ފުރުވާލާނެ ކަމަށެވެ.

މި ސަރުކާރުގެ އަމާޒަކީ ގަވާއިދާ ހިލާފަށް އުޅޭ ބިދޭސީންގެ މައްސަލަ ތިން އަހަރު ތެރޭގައި ހައްލު ކުރުން ކަމަށްވާއިރު ރައީސް މުހައްމަދު މުއިއްޒު ވަނީ ނޮވެމްބަރު މަހުގެ ނިޔަލަށް 5012 ބިދޭސީން ފޮނުވާލެވިފާކަމަށް ވިދާޅުވެފައެވެ. ރައީސް ވިދާޅުވީ މިއީ ފާއިތުވި 3 އަހަރަށް ބަލާއިރުވެސް ގަވައިދާ ހިލާފަށް އުޅެމުން ދިޔަ ބިދޭސީން ބޭރުކުރެވިފައި ނުވާ މިންވަރެއް ކަމަށެވެ.

ހަބަރު ރައީސް ޑރ. މުހައްމަދު މުއިއްޒު ބިދޭސީން އިމިގްރޭޝަން