ރައީސުލްޖުމްހޫރިއްޔާގެ އަނބިކަނބަލުން މެޑަމް ސާޖިދާ މުހައްމަދު، "ހުރާ އެކުވެރި ހިޔާ" ހުޅުއްވައިދެއްވައިފިއެވެ.
"ހުރާ އެކުވެރި ހިޔާ" އަކީ އެ ރަށު ރައްޔިތުން އެއްތަންވެ އެކުވެރިކަން އާލާކުރުމުގެ ބޭނުމުގައި އަޅާފައިވާ ބިނާއެކެވެ.
"ހުރާ އެކުވެރި ހިޔާ" ހުޅުއްވައި ދެއްވުމަށްފަހު، ސާޖިދާ ދެއްކެވި ވާހަކަފުޅުގައި ހުރާއަކީ ވަރަށް އެކުވެރި ރައްޔިތުންތަކެއް ދިރިއުޅޭ ރަށެއް ކަމަށް ވަނީ ވިދާޅުވެފައެވެ. މިއަދު ހުޅުވި ބިނާގެ ސަބަބުން ރައްޔިތުންގެ މެދުގައި އޮތް އެކުވެރިކަމާއި ބަދަހިކަން އިތުރުވެގެންދާނެ ކަމަށް އުންމީދު ކުރައްވާކަމުގައި ސާޖިދާ ވިދާޅުވިއެވެ.
މި ރަސްމިއްޔާޓުގައި ސާޖިދާ ދެއްކެވި ވާހަކަފުޅުގައި ވަނީ މި ޖީލު ވަރަށް ބޮޑަށް ޑިޖިޓަލައިޒްވެފައިވާ ކަން ފާހަގަ ކުރައްވާފައެވެ. އެކަކު އަނެކަކާއި ބައްދަލުވެ ވާހަކަދައްކާލުން މި އޮތީ ވާޗުއަލް ކަމަކަށް ބަދަލުވެފައި ކަމުގައި ވިދާޅުވިއެވެ. އެހެން ނަމަވެސް އެއް އިންސާނަކާއި އަނެއް އިންސާނަކާ ދެމެދު އޮންނަ ގުޅުން ބަދަހިކުރުމަށްޓަކައި އެކަކު އަނެކަކާއި ސީދާ ބައްދަލުވުމަކީ ވަރަށް މުހިންމު ކަމެއް ގޮތުގައި ސާޖިދާ ފާހަގަކުރެއްވިއެވެ. އަދި މިފަދަ ހިޔާއަކުން އެ މަގުސަދު ހާސިލުވެގެންދާނެ ކަމުގައި ވިދާޅުވިއެވެ.
"ހުރާ އެކުވެރި ހިޔާ" ހުޅުއްވައިދެއްވުމަށްފަހު، ރައީސުލްޖުމްހޫރިއްޔާގެ އަނބިކަނބަލުން ވަނީ މި ރަސްމިއްޔާތަށް ހާޒިރުވި ގިނަ އަދަދެއްގެ ރައްޔިތުންނާ ބައްދަލުކުރައްވައި، އެ ބޭފުޅުންނާއެކު "ހުރާ އެކުވެރި ހިޔާ"ގައި ވަގުތު ހޭދަކޮއްލައްވާފައެވެ. ހުރާއަށް ސާޖިދާ ވަޑައިގަތުމުން އެ ރަށު ރައްޔިތުން ވަނީ ވަރަށް ހޫނު މަރުހަބާއެއް ކިޔާފައެވެ.
