މަގުމަތީ ކުދި ވިޔަފާރި ހިންގާ، އާންމު ތަންތަނުގައި ނިދާ ހަދަމުން ދިޔަ އަންހެން ފަތުރުވެރިޔަކު އިމިގްރޭޝަނުން ހައްޔަރުކޮށްފިއެވެ.
އިމިގްރޭޝަނުން ބުނީ އާންމުންގެ ޝަކުވާއާއެކު އިއްޔެ ހައްޔަރުކޮށްފައި ވަނީ އުމުރުން 33 އަހަރުގެ ކުއިޕިންގް ފެންގް ކަމަށެވެ. ކުއިޕިންގް އަކީ މަގުމަތީ ކުދި ވިޔަފާރި ހިންގަމުންދިޔަ މީހަކަށްވާއިރު އޭނާ ވިއްކަމުންދަނީ ތަޅުދަނޑިއަށް ލައްވާ ފަދަ ބާވަތުގެ ކުދި ކުދި ތަކެއްޗެވެ. އަދި އޭނާ އާންމު ތަންތަނުގައި ދިރިއުޅުމާއި ނިދާ ކަމުގެ ޝަކުވާ ލިބިފައިވާ ކަމަށްވެސް އިމިގްރޭޝަނުން ވަނީ ބުނެފައެވެ.
އަދި މިފަދައިން ގަވާއިދާ ހިލާފަށް އުޅެމުންދާ ބިދޭސީއެއްގެ މައުލޫމާތު އެނގިއްޖެނަމަ ލަސްނުކޮށް އިމިގްރޭޝަނަށް ރިޕޯޓު ކުރުމަށް ވެސް ވަނީ އެދިފައެވެ.
ބިދޭސީން ރާއްޖޭގައި ގަވާއިދާ ހިލާފަށް ވިޔަފާރި ކުރާ މައްސަލަތަކަކީ އާންމު މައްސަލަތަކަށްވާއިރު މިފަދަ ފަރާތްތަކާ މެދު އިމިގްރޭޝަނުން ދަނީ ފިޔަވަޅު އަޅަމުންނެވެ. އެގޮތުން މިފަދަ މައްސަލަތައް ހައްލު ކުރުމަށް އެ އިދާރާއިން މިހާރުވެސް ހާއްސަ އޮޕަރޭޝަނެއް ހިންގަމުންދާއިރު ފާއިތުވި 11 މަސްދުވަހު ގަވާއިދާ ހިލާފަށް އުޅުނު 4000 ހަށްވުރެ ގިނަ ބިދޭސީން ވަނީ ޑީޕޯޓުކޮށްލާފައެވެ.
އެ މަސައްކަތުގެ ދަށުން މާލޭގައި ހިންގާ އޮޕަރޭޝަންގެ އިތުރުން މީހުން ދިރިއުޅޭ އެހެން ރަށްރަށާއި ރިސޯޓުތަކާއި ސިނާއީ ރަށްތަކާއި ދަނޑުވެރިކަމަށް ދޫކޮށްފައިވާ ރަށްތަކުގައި ދިރިއުޅޭ ބިދޭސީންގެ މައުލޫމާތު އެއްކުރުމުގެ މަސައްކަތްވެސް ދަނީ ކުރަމުންނެވެ.
އަދި އާންމު ސަލާމަތާއި ރައްކާތެރިކަމަށް ނުރައްކާވާފަދަ ގޮތަށް ކާބޯތަކެތި ތައްޔާރުކުރާ ތަންތަން ބަލައި ފާސްކުރުމަށް ހާއްސަ އޮޕަރޭޝަނެއްވެސް ފަށާފައިވާއިރު ސަރުކާރުގެ އަމާޒަކީ އަދި ރާއްޖޭގަތިބި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނެސް ބިދޭސީންގެ މައްސަލަތަކަށް 3 އަހަރު ތެރޭ ހައްލު ކުރުމެވެ.
