ކެންސަރު ބައްޔަށް ފަރުވާ ކުރަމުން ދިޔަ މީހަކަށް ދިން އެހީގެ ތަފްސީލު ހާމަކުރެވުނީތީ ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން މާފަށް އެދިއްޖެއެވެ.
ކެންސަރުގެ ބައްޔަށް ފަރުވާ ހޯދަމުން ދިޔަ މީހަކަށް އެންސްޕާއިން އެހީ ނުދިން ކަމަށް ބުނެ ސޯޝަލް މީޑީއާގައި ކުރި ޕޯސްޓަކާ ގުޅިގެން އެއީ ދޮގު މައުލޫމާތުކަން ހާމަކުރުމަށް އެންސްޕާއިން ވަނީ އެމީހާއަށް ދިން އެހީގެ ތަފްސީލް ހާމަކޮށްފައެވެ.
މި ކަމާ ގުޅިގެން މިއަދު ނެރުނު ނޫސް ބަޔާނެއްގައި އެންސްޕާއިން ވަނީ އެ އެޖެންސީއިން ބަލި މީހަކަށް އެހީނުދިން ކަމަށް ބުނެ، ސޯޝަލް މީޑިއާގައި ދޮގުމައުލޫމާތު ފަތުރާ އެ އެޖެންސީ ބަދުނާމުވާ ގޮތަށް ފެތުރެމުންދިޔަ ވާހަކަތަކާ ގުޅިގެން އެކަން ހިނގާފައިވާ ގޮތުގެ ތަފްސީލް ހާމަކުރުމުގެ ގޮތުން ބަޔާނެއް ނެރެފައިވާކަން ފާހަގަކޮށްފައެވެ.
އެންސްޕާއިން ބުނީ އެ ބަޔާނުގައި ބަލި މިޙާގެ އެއްވެސް އައިޑެންޓިޓީއެއް ބަޔާންކޮށްފައި ނެތް ނަމަވެސް، އެ ބަޔާނުގައި ބަލިމީހާއަށް ދީފައިވާ އެހީގެ މައުލޫމާތު ހިމެނިފައިވާތީ އެއީ އެންމެ ރަނގަޅު ގޮތް ނޫން ކަމަށެވެ. އަދި އެފަދަ މައުލޫމާތުތައް ހިމެނިފައިވާތީ އެކަމަށް އެންސްޕާއިން ވަނީ މައާފަށް އެދިފައެވެ.
ބަލި މީހާއަށް ދީފައިވާ އެހީގެ ތަފްސީލް އާންމު ކުރުމާއެކު އެންސްޕާއަށް ވަނީ ގިނަ އާންމުންގެ ފާޑުކިޔުންތައް އަމާޒުވެފައެވެ.
