ފާއިތުވި އަހަރެއްހާ ދުވަހުގެތެރޭގައި ސަރުކާރާއި ކައުންސިލްތަކާއެކު އޮތް ގުޅުން ބަދަހިވެ، ކައުންސިލްތަކުގެ އިތުބާރު ލިބިފައިވާކަމަށް މިނިސްޓްރީ އޮފް ސިޓީސް، ލޯކަލް ގަވަމަންޓް އެންޑް ޕަބްލިކް ވަކްސް މިނިސްޓަރު އާދަމް ޝަރީފް އުމަރު ވިދާޅުވެއްޖެއެވެ.
ޕީއެސްއެމް ނިއުސްއިން ގެނެސްދިން "ހަފްތާ 52" ޕްރޮގްރާމުގައި ޝަރީފް ވިދާޅުވީ ސަރުކާރުން ލާމަރުކަޒީ ނިޒާމު ހަރުދަނާ ކުރުމަށް ކައުންސިލްތަކަށް ހާއްސަ މިނިސްޓްރީއެއް އުފެއްދީ ކައުންސިލްތަކާ ގާތުން މަސައްކަތްކޮށް ރައްޔިތުންނަށް ބޭނުންވާ ހިދުމަތްތައް ކަށަވަރު ކޮށްދިނުމަށް ކަމަށެވެ.
އެގޮތުން ފާއިތުވި އެއްހަރުގެ ތެރޭގައި 280 އަށް ވުރެ ގިނަ ކައުންސިލާއެކު ބައްދަލުވުންތައް ބާއްވާފައިވާކަން ފާހަގަކޮށް އާދަމް ޝަރީފު ވިދާޅުވީ ފާއިތުވި އެއްއަހަރު ރައީސުލްޖުމްހޫރިއްޔާ ޑރ. މުހައްމަދު މުއިއްޒު 169 ކައުންސިލާ ބައްދަލުކުރެއްވި ކަމަށެވެ. މިކަމުންވެސް އަންގައިދެނީ މި ސަރުކާރުން ކައުންސިލްތަކާއެކު އޮންނަ ގުޅުން ބަދަހިކުރުމަށް ކުރައްވާ މަސައްކަތްކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ ކައުންސިލްތަކުން ސަރުކާރަށް ކުރާ އިތުބާރު ބޮޑުވެ، ކަންކަމުގައި އެއްބާރުލުން ވަރަށް ބޮޑަށް ލިބެމުން އަންނަކަމަށެވެ. އަދި ހަގީގީ މާނާގައި ކައުންސިލްތައް ބާރުވެރި ކުރެވޭނީ ކައުންސިލްތަކަށް މާލީ ފުދުންތެރިކަން ލިބިގެންކަން މިނިސްޓަރު ވިދާޅުވިއެވެ. އަދި ސަރުކާރުން އެކަމަށް މަސައްކަތްތަކެއް ކުރައްވާކަމަށް މިނިސްޓަރު ވިދާޅުވިއެވެ.
މި ސަރުކާރުން ކައުންސިލުތަކަށް ދެމުންދާ އެހީތެރިކަމާއި އެއްބާރުލުން ފާހަގަކޮށް މިނިސްޓަރު ވިދާޅުވީ ކޮންމެ ކައުންސިލަކަށްވެސް ފަޅުރަށެއް ލިބޭނެ އުސޫލެއް ރައީސް އިއުލާންކުރައްވާފައިވާ ކަމަށެވެ. އަދި އޭގެ ދަށުން ކައުންސިލްތަކުން ފަޅުރަށްތައް ހޯދުމަށް ހުށަހަޅާފައިވާކަން ފާހަގަކޮށް މިނިސްޓަރު ވިދާޅުވީ ކޮންމެ ރަށަކުން ލިބޭ ގްރީންޓެކްސްގެ 10 ޕަސަންޓް ކައުންސިލަށް ލިބޭގޮތަށް ރައީސް ކަނޑައަޅުއްވާފައިވާ ކަމަށެވެ.
ކައުންސިލްތަކަށް އެންމެ ބޮޑަށް ބޭނުންވާ ކަމަކީ މަސައްކަތް ކުރެވޭނެ ރަނގަޅު މާހައުލެއް ގާއިމުކޮށްދިނުންކަން ފާހަގަކޮށް މިނިސްޓަރު ވިދާޅުވީ އެކަމަށްޓަކާއި، ކައުންސިލް އިމާރާތްތައް އެޅުމުގެ މަޝްރޫއުއެއް މިހާރު ކުރިއަށް ގެންދާކަމަށެވެ. އަދި ގާނޫނީ ނިޒާމުގެ ތެރެއިން ކައުންސިލްތަކަށް އިތުރު ބާރުވެރިކަންދީގެ މަސައްކަތްކުރުމުގެ ވަރަށް ގިނަ ބަދަލުތައް ކުރިއަށް އޮތްތަނުގައި ފެންނާނެކަމަށް މިނިސްޓަރު ވިދާޅުވިއެވެ.
މީގެ އިތުރުން މިނިސްޓަރު ވިދާޅުވީ ރާއްޖޭގައި ލާމަރުކަޒީ ނިޒާމު އޮންނަންޖެހޭ ކަމަށް ރައްޔިތުން ގަބޫލުކޮށް، އެ ނިޒާމު ބަލައިގެންފައިވާކަމަށެވެ. ނަމަވެސް ލާމަރުކަޒީ ނިޒާމުގެ ގާނޫނަށް މީގެކުރިން ގެނެވުނު ބައެއް ބަދަލުތަކަކީ ޖަޒުބާތުގައި ޖެހިގެން ގެނެވުނު ބަދަލުތަކެއްކަމަށް މިނިސްޓަރު ވިދާޅުވިއެވެ. އިތުރަށް މިނިސްޓަރު ވިދާޅުވީ މި ސަރުކާރުން ލާމަރުކަޒީ ނިޒާމު ހަރުދަނާކުރުމަށް ގާނޫނަށް އިސްލާހުތައް ގެންނާނީ އެކަމަށް ބޭނުންވާ ދިރާސާތައް ކޮށްގެންކަމަށާއި، އޭގެ ދިރާސާތައްވެސް ނިމިފައިވާކަމަށެވެ.
