ބިދޭސީންނާއި ގުޅޭ ބައެއް ކަންކަމުގައި ރިޝްވަތު ނަގަމުން ދިޔަ، އިމިގްރޭޝަންގެ ފަސް އޮފިސަރެއްގެ މައްސަލައެއް ބަލަމުން ދާކަމަށް ހޯމް މިނިސްޓަރު އަލީ އިހުސާން ވިދާޅުވެއްޖެއެވެ.
މިނިސްޓަރު އެކްސްގައި ކުރެއްވި ޕޯސްޓެއްގައި ވިދާޅުވީ ޔުނިފޯމު އެޅި މުއައްސަސާތަކުގެ ތެރޭގައި ތިބެ ޔުނިފޯމުގެ ހުރުމަތްކަނޑާ، ރައްޔިތުންގެ ކުރިމަތީ މުއައްސަސާތަކުގެ އިތުބާރު ގެއްލުވަމުންދާ ފަރާތްތަކާ ދޭތެރޭ ގާނޫނީ ގޮތުން އެޅޭ އެއްމެ ހަރުކަށިފިޔަވަޅު އެޅުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަންގަވާފައިވާކަމަށެވެ.
މިގޮތުން މޯލްޑިވްސް އިމިގްރޭޝަން ގެ 5 މުވައްޒަފުން ގާނޫނާއި ގަވާއިދުތަކާއި ހިލާފަށް ބިދޭސީންނާއި ގުޅުންހުރި ބައެއްކަންކަންކޮށް، އެކި ފަރާތްތަކުން ނަހަމަގޮތުގައި ފައިސާ ހޯދަމުންދާކަމަށް ތުހުމަތުކުރެވޭ މައްސަލައެއްގެ މައުލޫމާތު ލިބިފައިވާކަމަށެވެ. އަދި ފުލުހުން މެދުވެރިކޮށް އެމައްސަލަ ތަހުގީގުކުރަމުން އަންނަކަމަށް އިހްސާން ވިދާޅުވިއެވެ. އިތުރަށް އިހްސާން ވިދާޅުވީ މި މައްސަލާގައި ތުހުމަތުކުރެވޭ ފަރާތްތަކުން ބޭނުންކުރާ އިލެކްޓްރޯނިކް ސާމާނު ހިފެހެއްޓި، އެމީހުން ދިރިއުޅޭ ތަންތަން ބަލައި ފާސްކޮށްފައިވާކަމަށެވެ.
މީގެ އިތުރުން މިނިސްޓަރު ވިދާޅުވީ މިފަދަ ކަންކަމަކީ މިސަރުކާރުން އެއްވެސް ވަރަކަށް ތަހައްމަލު ކުރާނެ ކަންކަމެއް ނޫންކަމަށެވެ. މިމައްސަލައިގެ އިތުރު ތަފްސީލުތައް ތަހުގީގު ކުރިއަށްދާ ވަރަކުން ފުލުހުނާއި ކަމާއިބެހޭ އެހެން އިދާރާތައް ގުޅިގެން ހާމަކުރަމުންދާނެކަމަށްވެސް އިހްސާން ވިދާޅުވިއެވެ. އަދި ދައުލަތުގެ މުއައްސަސާތަކުގެ އިތުބާރު ގެއްލިދާނެފަދަ ކަންކަމުން ބަރީއަވެ ތިބުމަށް މިނިސްޓަރުވަނީ އިލްތިމާސްކޮށްފައެވެ،
