އުމުރުން ދުވަސްވީ މީހުންނަށް ހާއްސަކޮށްގެން އުރީދޫ އިން ހާއްސަ ސެޝަނެއް ސ. ފޭދޫގައި ބާއްވައިފިއެވެ.
އުރީދޫ އިން ބުނީ "ގްރޯ ވިތް އުރީދޫ"ގެ ސިލްސިލާގެ ދަށުން ބޭއްވި މި ސެޝަނަކީ އިސްރަށްވެހިންނަށް ހާއްސަކޮށްގެން ކުރިއަށް ގެންދެވުނު ސެޝަނެއްކަމަށާއި، މި ސެޝަންގައި ގޭގައި ގަސްއިންދުމާއި ހެއްދުމަށް ކުރެވިދާނެ ކަންކަން ކިޔާދީ އަމަލީ ސެޝަނެއްވެސް ކުރިއަށް ގެންދިޔަ ކަމަށެވެ.
އުރީދޫ އިން ބުނީ މި ސެޝަން ކުރިއަށް ގެންދެވުނީ ސ. ފޭދޫ އަވަށު އޮފީހާ ގުޅިގެން ކަމަށެވެ. ގްރޯ ވިތް އުރީދޫގެ އެމްބެސެޑަރު ރަމްޒީ ހުސައިން ނަގައިދިން މި ސެޝަނުގައި އުމުރުން ދުވަސްވީ މީހުންނަށް އެކްޓިވް ހަރަކާތްތަކެއް ކުރިއަށްގެންގޮސްފައިވާކަމަށާއި، މި ހަރަކާތްތަކުގެ ސަބަބުން ޖިސްމާނީ އަދި ނަފްސާނީ ދުޅަހެޔޮކަން އިތުރުވެގެން ދާނެ ކަމަށް އުރީދޫ އިން ވަނީ ބުނެފައެވެ.
ފާހަގަކޮށްލެވޭ ގޮތުގައި މިއީ ގްރޯ ވިތް އުރީދޫގެ ސިލްސިލާ ހަރަކާތްތަކުގެ ތެރެއިން މިއަހަރު ބޭއްވޭ 3 ވަނަ ހަރަކާތެވެ.
އުރީދޫ އިން އިތުރަށް ބުނީ ގްރޯ ވިތް އުރީދޫ ސިލްސިލާގެ ދަށުން ރާއްޖޭގެ އެކި ރަށްރަށަށް ޒިޔާރަތްކޮށް ބައިވެރިންގެ މެދުގައި ގުޅުން ބަދަހިކުރުމުގެ ގިނަ ހަރަކާތްތަކެއް ރޭވިފައިވާކަމަށާއި، މި ސިލްސިލާގައި އެކި އުމުރުފުރާތަކަށް ހާއްސަކޮށްގެން ޕްރޮގްރާމްތައް ކުރިއަށް ގެންދެވޭނެކަމަށެވެ.
އުރީދޫ އިން ބުނީ އެ ކުންފުނިން އަބަދުވެސް މަސައްކަތް ކުރަނީ މައުލޫމާތު ހިއްސާކުރުމާއި އަމަލީ ހުނަރުގެ ޒަރިއްޔާއިން މި ޑިމޮގްރަފިކް ބާރުވެރިކުރުވާ އެ މީހުންގެ ދިރިއުޅުމުގެ ފެންވަރު މަތިކުރުމަށް ކަމަށެވެ.
