ޕާކިސްތާނުގެ ރައްޔިތުންގެ މަދުގައި މަގުބޫލު ކުރީގެ ކުރިކެޓް ކުޅުންތެރިޔާ އަދި ބޮޑުވަޒީރު އިމްރާންހާން މިނިވަން ކުރުމަށް ގޮވާލައި އޭނާގެ ސަޕޯޓަރުން މަގުތަކަށް ނިކުތުމާއެކު ހުރިހާ ހައިވޭއެއް ބަންދުކޮށް ސަރުކާރުން މުވާސަލާތީ ހިދުމަތްތައް ކަނޑާލައިފިއެވެ.
އިމްރާންހާން ނިސްބަތްވާ ޕާޓީގެ ހުރިހާ ލީޑަރުން ހިމެނޭހެން އެންމެން މިނިވަން ކުރުމާއެކު މިހާރު ވެރިކަން ކުރާ އިދިކޮޅު ޕާޓީ އިސްތިއުފާ ދިނުމަށް ގޮވާލައި އޭނާގެ ސަޕޯޓަރުން މަގުތަކަށް ނިމުކެ މިސްރާބު ޖަހާފައި ވަނީ ވެރިރަށް އިސްލާމްއާބާދަށެވެ. އެއާއެކު އެމީހުންނަށް ހުރަސް އެޅުމަށްޓަކައި ހާހުން ހާހުން ސިފައިންނާއި ފުލުހުން، މުގުރާއި ޝީލްޑާއި ބަޑި ހިފައިގެން މަގުތަކަށް ނިކުމެފައި ވާ އިރު، އިސްލާމްއާބާދާ ގުޅޭ ހުރިހާ ހައިވޭއެއްގެ އިތުރުން ބޮޑެތި އެހެން ހުރިހާ މަގުތަކެއް ވަނީ ބަންދުކޮށްފައެވެ.
ބޮޑެތި ކޮންޓެއިނާ ތައް ބަހައްޓާ ބޮޑެތި މަގުތައް ބަންދުކޮށްފައި ވާ އިރު އެހެން ބައެއް މަގުތައް ބަންދު ކޮށްފައި ވަނީ ބެރިކޭޑް ޖަހައިގެންނެވެ. މީގެ އިތުރުން މުވާސަލާތީ ހިދުމަތްތަކަށް ބޭނުންކުރާ ވަޓްސްއެޕާއި، އެކްސް ފަދަ ޕްލެޓްފޯމްތައް ސަސްޕެންޑް ކޮށް އެ ހިދުމަތްވެސް ވަނީ ކަނޑާލާފައެވެ.
ސަރުކާރުގެ މި ފިޔަވަޅާ ގުޅިގެން ބޭރުގެ ބައެއް ނޫސްތަކަށް މައުލޫމާތު ދެމުން އޮފިޝަލުން ބުނެފައި ވަނީ، މަގުތައް ބަންދު ކުރީ މަރާމާތުގެ މަސައްކަތްކަށް ކަމަށެވެ. ނަމަވެސް ހަގީގަތަކީ އެއީ ނޫން ކަމަށާއި މަގުތައް ބަންދުކޮށް ގައުމު ހުއްޓުމަކަށް ގެނެސްފައި ވަނީ ޖަލުގައި މިހާރު ހުންނެވި އިމްރާންހާނާއި އޭނާގެ ޕާޓީގެ ލީޑަރުން މިނިވަން ކުރުމަށް ގޮވާލައި އޭނާގެ ސަޕޯޓަރުން މަގުތަކަށް ނުކުތުމުންނެވެ.
މުރާސިލުން ބުނާގޮތުގައި، ޖަލުގައި ހުންނަވައިގެން އިމްރާންއަށް އެހާ ވަރުގަދަ ހަރަކާތެއް ހިންގެވޭއިރު އެއީ އޭނާގެ ބާރާއި ނުފޫޒު ގަދަކަން ރަމްޒުކޮށްދޭ ވަރުގަދަ ހެއްކެކެވެ.
ނިމިދިޔަ އިންތިހާބުގައި މެޖޯރިޓީ ހޯދި ފަރާތްތަކަކީ ވެސް އިމްރާން ނިސްބަތްވާ ފާޓީގެ މެންބަރުން ކަމަށް ވާއިރު ގާނޫނު ހަދާ މަޖިލީހުގައި ގިނައީ އެމީހުނެވެ. އެ އިންތިހާބުގައި އެމީހުން ވާދަކުރީ، އިމްރާންގެ ޕާޓީ އިން ވާދަކުރުން މަނާކުރުމުން މިނިވަން ކެންޑިޑޭޓުންގެ ގޮތުގައެވެ.
