ގަވާއިދާ ހިލާފަށް ރާއްޖެ އައި ސްރީލަންކާގެ މަސްބޯޓަކުން 400 ކިލޯއަށް ވުރެ ގިނަ މަސްތުވާތަކެތި އަތުލައިގެންފިއެވެ.
މިއަދު ހަވީރު އިސްކަންދަރު ކޮށީގައި ބޭއްވި ނޫސްވެރިންގެ ބައްދަލުވުމެއްގައި ކޮމިޝަނާ އޮފް ޕޮލިސް އަލީ ޝުޖާއު ވިދާޅުވީ ގަވާއިދާ ހިލާފަށް ރާއްޖެ އައިސް އުޅެނިކޮށް ހދ. މަކުނުދޫ ބޭރުން ރޭ ދަންވަރު ސްރީލަންކާގެ މަސްބޯޓެއް ހިފަހައްޓާފައި ވާކަމަށާއި އެ ބޯޓުން 468.6 ކިލޯގެ މަސްތުވާތަކެތި ފެނިފައިވާ ކަމަށެވެ.
ޝުޖާއު ވިދާޅުވީ އެ ބޯޓުން ފެނިފައިވަނީ 344 ކިލޯގެ މެތު، 124.6 ކިލޯގެ ކޮކެއިން ކަމަށާއި އެ ތަކެތީގެ މަގުމަތީގެ އަގު 1 ބިލިއަން ރުފިޔާއަށް އަރާކަމަށެވެ. ޝުޖާއު އިތުރަށް ވިދާޅުވީ އެ ބޯޓު ރޭ ކޯސްޓުގާޑުގެ ބެލުމުގެ ދަށަށް ގެންގޮސް މިއަދު ހެނދުނު ހދ. ކުޅުދުއްފުއްޓަށް ގެންގޮސްފައިވާ ކަމަށެވެ. މީގެއިތުރުން ޝުޖާއު ވިދާޅުވީ "އަށެންކުތަ" ނަމަކަށް ކިޔާ އެ ބޯޓުގައި ތިބީ ލަންކާގެ 5 ފިރިހެނުން ކަމަށާއި މި މައްސަލަ އިތުރަށް ތަހުގީގު ކުރަމުން ދާ ކަމަށެވެ.
ފުލުހުން މީގެ ކުރިން ހާމަކޮށްފައިވާ ތަފާސް ހިސާބު ތަކުން ހާމަވާ ގޮތުގައި މި އަހަރުގެ 1 ޖެނުއަރީން އޮގަސްޓު މަހުގެ 31 ވަނަ ދުވަހުގެ ނިޔަލަށް ފުލުހުންގެ ޑްރަގް އެންފޯސްމަންޓް އިން ޖުމްލަ 282 މިލިއަން ރުފިޔާގެ މަސްތުވާތަކެއްޗާއި ބަނގުރާ އަތުލައިގަނެފައި ވެއެވެ.
އެގޮތުން އެފަދަ މައްސަލަތަކުގައި 8554 މީހުން ބަލާ ފާސްކޮށްފައި ވާއިރު 712 މީހުން ވަނީ ހައްޔަރުކޮށްފައެވެ. މަސްތުވާތަކެއްޗާ ދެކޮޅަށް ޖުމްލަ 113 އޮޕަރޭޝަނެއް ފުލުހުންގެ ޑްރަގް އެންފޯސްމަންޓް އިން ހިންގާފައި ވާއިރު 80 ބިދޭސީން ވަނީ އިމިގްރޭޝަނާއި ހަވާލުކޮށްފައެވެ.
އަދި އެކިއެކި އޮޕަރޭޝަންތަކުގައި 158.84 ކިލޯގެ މަސްތުވާތަކެތި ފުލުހުންގެ ބެލުމުގެ ދަށަށް ގެނެސްފައި ވާއިރު އަތުލެވުނު މަސްތުވާތަކެއްޗާއި ބަނގުރަލުގެ އަދަދު 282،273،651.52 މިލިއަނަށް އަރާ ކަމަށް އެ ތަފާސް ހިސާބުތަކުން ހާމަވެއެވެ.
