އިންޑިއާ އިން ރާއްޖެއަަށް ފޮނުވި 70 ޓަނުގެ ހަކުރު ގަވާއިދާ ހިލާފަށް ސްރީލަންކާ އަށް ގެންދިޔަ ކަމަށް ބުނާ މައްސަލައެއް ބަލަން ފަށައިފިއެވެ.
އިންޑިއާގެ އިކޮނޮމިކް މިނިސްޓްރީގެ ދަށުން ހިންގާ ނޫހެއް ކަމަށްވާ ދި ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ)ގައި ރިޕޯޓު ކޮށްފައިވާ ގޮތުގައި މިދިޔަ މަހުގެ 25 ވަނަ ދުވަހު އެ މައްސަލަ ފެންމަތިވެގެން އިންޑިއާގެ ސަރުކާރުން ދަނީ އެ މައްސަލަ ތަހުގީގު ކުރަމުންނެވެ.
މިއީ މިދިޔަ އޭޕްރީލް މަހުގެ 5 ގައި ރާއްޖެ އާއި އިންޑިއާ އިން ހެދި ހާއްސަ އެއްބަސްވުމެއްގެ ދަށުން ރާއްޖެއަށް ފޮނުވަން ނިންމާފައިވާ ޖުމްލަ 64،494.33 ޓަނުގެ ހަކުރުގެ ތެރޭގައި ހިމެނޭ 70 ޓަނުގެ ހަކުރު ކަމަށް އެ ނޫހުގައި ރިޕޯޓުކޮށްފައިވެއެވެ. މިމައްސަލަ ދިމާވުމުން 70 ކޮންޓެއިނަރުގެ ހަކުރު ލަންކާގެ ކަސްޓަމްސް އިން ހިފަހައްޓާފައިވާ ކަމަށްވެސް ރިޕޯޓުކޮށްފައިވެއެވެ.
މި ހަކުރު ޝިޕްމަންޓު ރާއްޖެއަށް ފޮނުވަން ނިންމާފައިވަނީ ޓްރާންސިޓްކޮށް ކަމަށާއި، އޭގެ ބިލް އޮފް ލޭޑިންގައި ބުނެފައިވާ ގޮތުން ފައިނަލް ޕޯޓް އޮފް ޑެސްޓިނޭޝަނަކީ ކޮލަމްބޯ ކަމަށްވެސް އެ ނޫހުގައި ވަނީ ރިޕޯޓުކޮށްފައެވެ.
ރާއްޖެއާއި އިންޑިއާ އާއި ދެމެދު މިދިޔަ އޭޕްރީލް މަހު ވެފައިވާ ހާއްސަ އެއްބަސްވުމުގެ ދަށުން ހަނޑުލާއި ހަކުރާއި ފުށުގެ އިތުރުން މުގާއި ބިހާއި ފިޔާ އަދި އަލުވި ރާއްޖެއަށް އެތެރެ ކުރަން ހާއްސަ ހުއްދައެއް ވަނީ ދީފައެވެ.
