ކ.ތިލަފުށީގައި ގަވާއިދާ ހިލާފަށް އުޅެމުންދިއަ 33 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން ބުނީ ކ.ތިލަފުށީގައި ބިދޭސީންނަށް އަމާޒުކޮށް ޓާސްކުފޯހުން މި މަހުގެ 21 ވަނަ ދުވަހު ހެނދުނުހާއްސަ ރެއިޑް އޮޕަރޭޝަނެއް ހިންގާފައިވާކަމަށެވެ. އިމިގްރޭޝަންގެ 28 އޮފިސަރުންނާއި ފުލުހުންގެ 35 އޮފިސަރުން ބައިވެރިވި މި ރެއިޑުގައި 257 ބިދޭސީއަކު ވަނީ ޗެކްކޮށްފައެވެ.
އިމިގްރޭޝަނުން އިތުރަށް ބުނީ، މީގެތެރެއިން ސައްހަ ވިސާއެއް ނެތި އުޅެމުންދިއަ 33 ބިދޭސީއަކު އިމިގްރޭޝަންގެ ބެލުމުގެ ދަށަށް ގެނެގޮސްފައިވާކަމަށެވެ. އަދި 22 ފަރާތަކަށް ލިޔުމުން ނޯޓިސް ހަވާލުކޮށްފައިވާކަމަށް އިމިގްރޭޝަނުން ވަނީ ބުނެފައެވެ.
ރާއްޖޭގައި ގަވައިދާ ހިލާފަށް އުޅެމުންދާ ބިދޭސީން ފޮނުވާލުމަށް ސަރުކާރުން ކުރަމުން އަންނަ މަސައްކަތްފުޅާކޮށް އަތޮޅު ތެރޭގެ ރަށްރަށުގައިވެސް މި އޮޕަރޭޝަން ފަށާފައިވާއިރު މީގެ ކުރިން ކޮންޓްރޯލާ އޮފް އިމިގްރޭޝަން މުހައްމަދު ޝަމްއާން ވަހީދު ވަނީ ނޮވެމްބަރު 17، 2023 އިން ފެށިގެން ފާއިތުވެދިޔަ 1 އަހަރު ތެރޭގައި ގަވާއިދާ ހިލާފަށް އުޅޭ 5000 ބިދޭސީން ފުރުވާލާ ޓާގެޓް ހާސިލުވެފައިވާ ކަމަށް ބުނެފައެވެ.
މީގެ އިތުރުން ޝަމްއާންވަނީ ބިދޭސީންގެ މައްސަލަ ހައްލު ކުރުމަށް ހޯމްލޭންޑް ސެކިއުރިޓީ މިނިސްޓަރު އަލީ އިހްސާންގެ ބެއްލެވުމުގެ ދަށުން އަދި ހޯމްލޭންޑް ސެކިއުރިޓީ މިނިސްޓްރީ އާއި ފުލުހުންނާ ގުޅިގެން އިމިގްރޭޝަނުން ކުރަމުންދާ މަސައްކަތްތަކުގައި ކާމިޔާބު ލިބެމުންދާކަންވެސް ފާހަގަކުރައްވާފައެވެ.
