ޕީޕަލްސް ނޭޝަނަލް ކޮންގްރެސް (ކޮންގްރެސް ޕާޓީ) ގެ އެތެރޭގެ އިންތިހާބު މި މަހުގެ 23 ވާ ހޮނިހިރު ދުވަހު ބޭއްވުމަށް ނިންމައިފިއެވެ.
އެ ޕާޓީ އިން ބުނީ އެ ޕާޓީގެ އެތެރޭގެ 59 ދާއިރާއަކަށް މެމްބަރުން އިންތިހާބު ކުރާނެ ކަމަށެވެ. ޕީއެންސީން ކުރިމަތިލި ކެންޑިޑޭޓުންގެ ނަންތައް ތަރުތީބުކޮށް ލިސްޓުތައް އާންމުކޮށްފައި ވާއިރު، ޖުމްލަ 91 ދާއިރާއެއްގެ ތެރެއިން ލިސްޓުގައި ވާގޮތުން 32 ދާއިރާއެއްގެ މަގާމުތަކަށް އެއްވެސް އިންތިހާބެއް ނެތި މެންބަރުން ވަނީ ހޮވިފައެވެ.
ވަކިވަކި ސިޓީތަކަށާއި ރަށްރަށަށް ބަލާއިރު، ކުޅުދުއްފުށީގެ ދާއިރާތަކަށް ވާދަކުރި ކެންޑިޑޭޓުން ހޮވިފައި ވަނީ އެއްވެސް އިންތިހާބަކާ ނުލައެވެ. އަދި ހޯރަފުށި ދާއިރާގެ ނައިބު ރައީސް ކަމަށް އެއްވެސް މެންބަރަކު ކުރިމަތިލާފައި ނުވާ ކަމަށް، ތަރުތީބު ކުރި ލިސްޓުގައި ދައްކައެވެ.
ޕީއެންސީގެ އެތެރޭގެ އިންތިހާބުގައި ވާދަކުރަން ހުޅުވާލާފައިވާ މަގާމު ތަކަކީ:
- ދާއިރާގެ ރައީސާއި ނައިބު
- ރަށްރަށުގެ / އެއް ރަށް ނުވަތަ އަވަށެއް ހިމެނޭ ދާއިރާއެއްގެ ޒުވާނުންގެ ރައީސާއި އަންހެނުންގެ ރައީސާއި ޒުވާން މެންބަރާއި އާންމު ފަސް މެންބަރުން
ޕީއެންސީގެ އެތެރޭގެ އިންތިހާބު ބާއްވާނެކަން އެ ޕާޓީގެ ފަރާތުން އިއުލާނުކުރީ މިދިޔަ ސެޕްޓެމްބަރު މަހުގައެވެ. އެ ޕާޓީން އެ ދުވަހު ބުނީ، ޖުމްލަ 2،095 މެންބަރުން އެ ޕާޓީގެ އެކި މަގާމުފުރާތަކަށް އައްޔަން ކުރެވޭނެ ކަމަށެވެ. އެންމެ ފުރަތަމަ ޕީއެންސީން އިއުލާނުކުރީ އެ ޕާޓީގެ އެތެރޭގެ އިންތިހާބު މިދިޔަ މަހުގެ 19 ވަނަ ދުވަހު ބާއްވާ ގޮތަށެވެ. ނަމަވެސް މި ތާރީހު ވަނީ ދެފަހަރެއްގެ މަތިން ފަސްކޮށްފައެވެ.
