ރައްޔިތުންގެ މަޖިލީހުގެ މެންބަރަކު އިންތިހާބުވާ ޕާޓީން ވަކިވެއްޖެ ނަމަ، ނުވަތަ ޕާޓީން ވަކިކޮށްފި ނަމަ މަޖިލީހުގެ މެންބަރުކަން ގެއްލޭ ގޮތަށް ގާނޫނު އަސާސީއަށް ގެނައި އިސްލާހު ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގު ކުރައްވައިފިއެވެ.
ސަރުކާރުގެ ފަރާތުން ހުޅުދޫ ދާއިރާގެ މެންބަރު މުހައްމަދު ޝާހިދު ހުށަހެޅުއްވި ގާނޫނު އަސާސީގެ އިސްލާހުތައް ފާސްކޮށްފައި ވަނީ މިއަދު ހަވީރު އެވެ. ސަރުކާރުން ބިލު ހުށަހެޅިއިރު، މެންބަރުކަން ގެއްލޭނެ ހާލަތްތައް އިސްލާހުގައި ވަނީ ބަޔާންކޮށްފައެވެ.
އެގޮތުން ވަކި ޕާޓީއަކުން ވާދަކޮށް މެންބަރުކަމަށް އިންތިހާބުވާ ފަހުން އެ މެންބަރަކު އެ ޕާޓީއަކުން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުންނާއި އެ މެންބަރަކު މިހާރު ތަމްސީލުކުރާ ޕާޓީން ވަކިވުމުން، ނުވަތަ އެ ޕާޓީން ވަކިވެ އެހެން ޕާޓީއަކާ ގުޅުމުން، ނުވަތަ ޕާޓީން އެ މެންބަރަކު ވަކިކުރުމުން ވެސް ގޮނޑި ގެއްލެއެވެ. އަދި ހަމައެހެންމެ އަމިއްލަގޮތުން ވާދަކޮށް އިންތިހާބުވާ މެންބަރުން ސިޔާސީ ޕާޓީއަކާ ގުޅުމުން ވެސް ގޮނޑި ގެއްލެއެވެ.
ކޮމިޓީ މަރުހަލާގައި ގަލޮޅު ދެކުނު ދާއިރާގެ މެންބަރު މީކާއީލް އަހްމަދު ނަސީމް ވަނީ މެންބަރުން ވަކިކުރުމުގެ ބާރު އެ ދާއިރާއެއްގެ ރައްޔިތުންނަށް ލިބޭގޮތަށް ގާނޫނުއަސާސީ އިސްލާހުކުރުމަށް ހުށަހަޅައިފައެވެ. ނަމަވެސް ކޮމިޓީން ނިންމީ އެ އިސްލާހު ބޭރުކޮށްލުމަށެވެ. އޭގެ ފަހުން ވެސް މީކާއީލް މި އިސްލާހު ހުށަހެޅުމުން، މަޖިލީހުން ވަނީ މި އިސްލާހު ބޭރުކޮށްލައިފައެވެ.
އެހެންވެ އެ އިސްލާހު ނުހިމަނާ ސަރުކާރުން ހުށަހެޅި ގޮތަށް ފާސްކުރަން ފެނޭތޯ ރިޔާސަތުން ވޯޓަށް އެހުމުން، ވޯޓުގައި ބައިވެރިވި 91 މެންބަރުންގެ ތެރެއިން 78 މެންބަރަކު ވޯޓު ދެއްވީ ގާނޫނުއަސާސީ އިސްލާހުކުރަން ފެންނަ ކަމަށެވެ. ނުފެންނަ ކަމަށް 13 މެންބަރަކު ވޯޓު ދެއްވިއެވެ.
ޕާޓީ ބަދަލުކޮށްފިނަމަ މެންބަރުކަން ގެއްލޭ އިސްލާހުގެ އިތުރުން، ގާނޫނުއަސާސީ އަށް ޝާހިދު ދެން ހުށަހެޅުއްވި ބައެއް އިސްލާހުތަކަކީ:
- ގައުމީ ތަރައްގީގެ ޕްލޭންތަކާއި ތަސައްވުރުތައް އެކުލަވާލުމުގެ ބާރުތައް ރައީސުލްޖުމްހޫރިއްޔާ އަށް ލިބޭ ގޮތަށް ހެދުން
- މަޖިލީހުގެ ފުރިހަމަ އަޣުލަބިއްޔަތުން ފާސްވެގެން ނޫނީ އަސްކަރީ ބޭނުމަކަށް ރާއްޖޭގައި އެއްވެސް ސަރަހައްދެއްގައި ބޭރުގެ ސިފައިންނަށް ހަރަކާތްތެރިވެވޭނެ ގޮތް ހެދުން
މި އިސްލާހުތަކާ އެކު ފާސްކުރި ބިލް ރައީސް މިއަދު ތަސްދީގު ކުރެއްވުމާ އެކު، މިހާރު އެ ވަނީ ގެޒެޓްގައި ޝާއިއުކޮށްފަ އެވެ.
