މި ސަރުކާރަށް ވުރެ ގިނައިން ޖުޑީޝަރީއަށް އަތްބޭނި އިތުރު ސަރުކާރެއް ނެތް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ޔާމީން މިފަދައިން ވިދާޅުވެފައި ވަނީ ޗެނަލް 13 އަށް ދެއްވި ހާއްސަ އިންޓަވިއުއެއްގައި ވާހަކަ ދައްކަވަމުންނެވެ. އެގޮތުން ޔާމީން ވިދާޅުވީ ޖުޑީޝަރީއަށް މި ސަރުކާރުން އަތް ނުބާނާނެ ކަމަށް ބުނަމުން އައި ނަމަވެސް، މި ސަރުކާރަށް ވުރެ ގިނައިން ޖުޑީޝަރީއަށް އަތްބާނާ އިތުރު ސަރުކާރެއް ނޯންނާނެ ކަމަށާއި، ޔާމީންގެ މައްސަލައަށްވެސް މި ސަރުކާރުން އަތްބާނާފައިވާ ކަމަށެވެ.
ޔާމީން ވިދާޅުވީ ރައްޔިތުންވެސް ޖުޑީޝަރީއަށް އިތުބާރު ނުކުރާ ކަމަށާއި، މި ސަރުކާރުން އަބަދުވެސް ދައްކަނީ ކުރީ ސަރުކާރުތަކުން ގޯސްކޮށް ކޮށްފައިވާ ކަންކަމުގެ ވާހަކަތައް ކަމަށެވެ. ޔާމީން ވިދާޅުވީ މި ސަރުކާރުގެ ނަޒަރުގައި އެހެން ސަރުކާރުތަކަށް ރަނގަޅަށް ކުރެވުނު އެއްކަމެއްވެސް ނެތް ކަމަށާއި، ރައީސް އިބްރާހިމް މުހައްމަދު ސޯލިހުގެ ސަރުކާރުންވެސް ފުރަތަމަ ދުވަހުން ފެށިގެން ހަދާފައިވަނީ ހުސް ގޯސް ކަަމަށެވެ.
މި ސަރުކާރަށް އެއް އަހަރު ވެގެން ދިޔައިރު ރައްޔިތުންނަށް އެއްވެސް ކަމެއްގައި ލުއިފަސޭހައެއް ނުލިބުން ކަމަށާއި އާސަންދައިންނާއި، ޓޫރިޒަމް ދާއިރާއަށް ބެލި ނަމަވެސް ރައްޔިތުންނަށް ކުރިމަތި ކުރުވާފައިވަނީ ބޮޑު ތަކުލީފެއްކަމަށް ޔާމީން ވަނީ ވިދާޅުވެފައެވެ. ޔާމީން ވިދާޅުވީ މިއާއެކު މި ސަރުކާރަށް ލިބިގެން ދާނީ "ޔޫ" ރިޕޯޓެއް ކަމަށެވެ.
ޔާމީންގެ މައްސަލައަށްވެސް މި ސަރުކާރުން އަތްބާނާފައިވާ ކަމަށް ޔާމީން ވިދާޅުވިއިރު، މި ސަރުކާރަށް އެއް އަހަރު ފުރުމާ ގުޅިގެން ސޯޝަލް ސެންޓަރުގައި ބޭއްވި ރަސްމިއްޔާތުގައި ވާހަކަދައްކަވަމުން ރައީސް ޑރ. މުހައްމަދު މުއިއްޒު ވިދާޅުވީ ކުރީގެ ރައީސް އަބްދުﷲ ޔާމީން މިނިވަންވެ ވަޑައިގެން ހުންނެވީ، ވެ ވަޑައިގަތް ވައުދާ އެއްގޮތަށް ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެންނެވިފައިވާތީ ކަމަށެވެ.
ރައީސް ވަނީ މި ސަރުކާރުން މަގާމެއް ދެއްވާފައިވާ އެއްވެސް ބޭފުޅަކު ޝަރުއީދާއިރާގެ ތެރެއަށް ނުފޫޒެއް ނުފޯރުވާނެ ކަމަށާއި އެފަދަކަމެއް ފާހަގަ ވެއްޖެނަމަ އެ ފަރާތެއް ވަގުތުން ވަޒީފާއިން ކަނޑާލާނެ ކަމުގެ އިންޒާރުވެސް އެރޭގެ ޖަލްސާގައި ދެއްވާފައެވެ.
ރައީސް ވިދާޅުވީ ރިޔާސީ އިންތިހާބު އެ މަނިކުފާނު ކާމިޔާބު ކުރެއްވުމާއެކު، ކުރީގެ ރައީސް އިބްރާހީމް މުހައްމަދު ސޯލިހު މަރުހަބާ ދެންނެވުމަށް ގުޅުއްވުމުން ވެސް، އެންމެ ފުރަތަމަ އެދިވަޑައިގަތީ ކުރީގެ ރައީސް ޔާމީން ގެއަށް ބަދަލުކޮށްދިނުމަށް ކަމަށެވެ.
