ގައުމާއި ރައްޔިތުންގެ ހައްގުގައި ރައީސް ޑރ. މުހައްމަދު މުއިއްޒު ނިންމަވާ ނިންމެވުންތަކަށް ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ތައުރީފު ކުރައްވައިފިއެވެ.
ސަރުކާރަށް 1 އަހަރު ފުރުމާ ގުޅިގެން އެކްސްގައި ކުރެއްވި ޕޯސްޓެއްގައި އަބްދުއްރަހީމް ވަނީ ދިވެހި ރައްޔިތުންނާއި ރައީސް މުއިއްޒުއަށް ތަހުނިޔާ ދަންނަވާފައެވެ.
މިއަދަކީ ޕީއެންސީގެ ސަރުކާރަށް އަދި ރައީސް މުއިއްޒުގެ ޒައާމަތަށް 1 އަހަރު ފުރޭ ދުވަސްކަން ފާހަގަކުރައްވާ އެ ޕޯސްޓްގައި އަބްދުއްރަހީމް ވިދާޅުވީ ގައުމާއި ރައްޔިތުންގެ ހައްގުގައި ރައީސް މުއިއްޒު އަޅުއްވަމުން ގެންދަވާ ހަރުދަނާ ފިޔަވަޅުތަކަށާއި ނިންމަވާ މުހިންމު ނިންމެވުންތަކަށް އައްސަރިބަހާ ސާބަސް ދަންނަވާ ކަމުގައެވެ.
މި ސަރުކާރު އަބަދުވެސް ކުރިއަށް ދާނީ ރައްޔިތުންގެ ފަޅީގައި އޮވެ ކަމަށް ރައީސް މުއިއްޒު ވަނީ ވިދާޅުވެފައެވެ. ރައީސް ވިދާޅުވެފައި ވަނީ ސަރުކާރުގެ އަމާޒަކީ ހުރިހާ ރައްޔިތުންނަށް އިންސާފުވެރިކަމާއެކު ތަނަވަސްކަން ހޯދައިދިނުމަށް ކަމަށެވެ.
ފާއިތުވި 1 އަހަރު ތެރޭގައި ރައީސް މުއިއްޒު ވަނީ ގައުމާއި ރައްޔިތުންގެ ހައްގުގައި މުހިންމު ނިންމެވުންތަކެއް ނިންމަވާފައެވެ. އެގޮތުން ގައުމުގެ މާލީ ހާލަތު ރަނގަޅު ކުރުމަށާއި ރައްޔިތުންނަށް ބޯހިޔާވަހިކަން ކަށަވަރުކޮށްދިނުމުގެ ގޮތުން ވެސް ވަނީ މަސައްކަތްޕުޅުތަކެއް ކުރައްވާފައެވެ.
