އެންމެ ޒަމާނީ ހައިބްރިޑް ކެތުލެބުގެ ހިދުމަތާއި ނެޝަނަލް ފާޓިލިޓީ ސެންޓަރުގެ ހިދުމަތުގެ އިތުރުން މުހިންމު ގިނަ ހިދުމަތްތަކެއް ލިބޭ ގޮތަށް ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިފިއެވެ.
ކުރީގެ ރައީސް އަބްދުﷲ ޔާމީންގެ ވެރިކަމުގައި ތަރައްގީކުރެއްވި ދަރުމަވަންތަ ހޮސްޕިޓަލް މިރޭ ރަސްމީކޮށް ހުޅުވައިދެއްވީ ރައީސް ޑރ.މުހައްމަދު މުއިއްޒުއެވެ. ރައީސް މުއިއްޒުގެ ހާއްސަ އިރުޝާދާއި ލަފާއާއި، އެމަނިކުފާނުގެ ސިއްހީ ދާއިރާގެ ވައުދުތައް ތަންފީޒްކުރުމުގެ މަސައްކަތުގެ ދަށުން، އެންމެ ޒަމާނީ ފެންވަރުގެ ވަސީލަތްތައް އެ ހޮސްޕިޓަލުގައި ވަނީ ގާއިމުކޮށްފައެވެ. މިހާރު މި ހޮސްޕިޓަލުގައި މުހިންމު ޚިދުމަތްތައް ޒަމާނީ ފެންވަރުގައި ގާއިމްކޮށްފައިވާއިރު ހޮސްޕިޓަލް ޓާޝަރީ ފެންވަރުގައި ހިންގުމުގެ އޮޕަރޭޓިން ލައިސެންސް ވެސް ހެލްތު މިނިސްޓްރީންވަނީ އެ ހޮސްޕިޓަލާ ހަވާލުކޮށްފައިވާއިރު 25 ފަންގިފިލާގެ މި ހޮސްޕިޓަލަކީ 500 އެނދުގެ ބޮޑު ހޮސްޕިޓަލެކެވެ.
މި ހޮސްޕިޓަލް ހުޅުވިއިރު ފެށި މުހިއްމު ހިދުމަތްތަކުގެ ތެރޭގައި ކުޑަކުދިންނަށް ހާއްސަ އީއާރެއްގެ ގޮތުގައި ދަރުމަވަންތައިގެ ހިދުމަތް ހަމަޖެއްސުން ހިމެނެއެވެ. ހޮސްޕިޓަލުގެ ކުޑަކުދިންނަށް ހާއްސަކޮށް އެމަޖެންސީ ފަރުވާ ގާއިމްކޮށްފައިވާއިރު، ކުޑަކުދިންނަށް ރަހުމަތްތެރި މާހައުލެއްގޮތަށް އެމަޖެންސީގައި ހާއްސަ ފަރުވާ ދެވޭނެ އިންތިޒާމު ވަނީ ހަމަޖެހިފައެވެ. މިކަމުގެ ސަބަބުން ކުޑަކުދިންނާއި ބެލެނިވެރިންނަށް އެތައް ފަސޭހައެއް ލިބިގެންދާނެއެވެ. އައިޖީއެމްއެޗުގެ އެމަޖެންސީ ހިދުމަތް ހޯދާ 20 ޕަސެންޓަކީ ކުޑަކުދިން ކަމަށް ވުމާއެކު މިއީ ރާއްޖޭގައި އަލަށް ތައާރަފްކުރާ ހިދުމަތަކެވެ.
އެންމެ ޒަމާނީ ހައިބްރިޑް ކެތުލެބުގެ ހިދުމަތް ދަރުމަވަންތަ ހޮސްޕިޓަކުގެ 11 ވަނަ ފަންގިފިލާގައި ގާއިމުކޮށްފައިވާ އިރު މި ލެބުގައި ވަނީ ނިއުރޯ ސާޖިކަލް، އެންޑޮވެސްކިއުލާ އަދި އިންޓަވެންޝަނަލް ރޭޑިއޮލޮޖީގެ ހިދުމަތް ގާއިމްކޮށްފައެވެ. މި ކެތުލެބާއެކު ފަރުވާހޯދުމަށް ރާއްޖެއިން ބޭރަށް ދާދިއުމަށް ނިމުމެއް އަންނާނެއެވެ. ސިކުނޑީގެ ލޭހޮޅި ބެދުމުން ކަފާނުލައި އެހޮޅި ހުޅުވާލުމާއި، ސިކުނޑީގެ ޓިއުމާ ލޭ ސަޕްލައިއާ ގުޅުންހުރި ނާރުގެ ފަރުވާއާއި ހިތުގެ އޮޕަރޭޝަންތައް ކުރެވޭނެ އިންތިޒާމު ވަނީ ހަމަޖައްސާފައެވެ.
އެންމެ ރަނގަޅު ފެންވަރުގެ ނެޝަނަލް ފާޓިލިޓީ ސެންޓަރުގެ ހިދުމަތް މި ތަނުން ލިބިގެން ދާއިރު އައިވީއެފް، ސްޕާމް ފްރީޒިން ދަރިމައިވުމުގެ ކަންކަމާ ގުޅޭ މުހިންމު ފަރުވާތައް ލިބިގެންދާނެއެވެ. ދަރުމަވަންތަ ހޮސްޕިޓަލް ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި ރޭ އިފްތިތާހް ކުރައްވާފައިވާއިރު، ހުޅުމާލޭ ހޮސްޕިޓަލް ޓާޝަރީ ފެންވަރަށް ހިދުމަތްދޭ ހޮސްޕިޓަލެއްގެ ގޮތުގައި އެ މަނިކުފާނު މިއަދު އިފްތިތާހް ކޮށްދެއްވުމަށް ވަނީ ހަމަޖެހިފައެވެ.
