އިންޓަނެޓް ނުވަތަ ސައިބާ ސްޕޭސް މެނޭޖްކޮށް، ސައިބާ ކުށްތައް ހުއްޓުވުމަށް ސައިބާ ހަމަލާތަކުން ރައްކާތެރިވުމުގެ ގާބިލުކަން ގައުމީ ފެންވަރުގައި ގާއިމުކުރަންޖެހޭ ކަމަށް ހޯމް މިނިސްޓަރު އަލީ އިހުސާނު ވިދާޅުވެއްޖެއެވެ.
ރޭ، ސައިބާ އެކްސްޕޯ 2024 އިފްތިތާހުކުރުމަށް އިސްކަންދަރު ކޮށީގައި ބޭއްވި ރަސްމިއްޔާތުގައި އިހުސާން ވިދާޅުވީ މި ސަރުކާރުން ވެރިކަމާ ހަވާލުވިއިރު ސަރުކާރުގެ އެކިއެކި އިދާރާތަކަށާއި އަމިއްލަ ވިޔަފާރިތަކަށް ދޭތެރެ ދޭތެރެއިން ސައިބާއެޓޭކްތައް އަންނަ ކަމަށެވެ. އަދި މިހާރު ރާއްޖޭގެ ސައިބާ ސްޕޭސް އޮތް ގޮތް ދިވެހީން ވަޒަންކުރަން ޖެހޭކަމަށް އިހްސާން ވިދާޅުވިއެވެ.
އެގޮތުން ރާއްޖޭގައި ފުރަތަމަ ފަހަރަށް ސައިބާސެކިއުރިޓީ ހަރަކާތެއް ފުލުހުންނާއި ކަމާގުޅޭ މުއައްސަސާތައް ގުޅިގެން ކުރިއަށްގެންދާކަމީ ރާއްޖޭގައި މި ދާއިރާގެ އިސްވެރީން މި މިކަންކަމާ ދޭތެރޭގައި ވިސްނުން ބަހައްޓަވާ މިންވަރު ހާމަވާ ކަމެއްކަަމަށް އިހްސާން ވިދާޅުވިއެވެ.
ދުނިޔޭގެ ތަފާސްހިސާބަށް ބަލާއިރު މިދިޔަ އަހަރާ އަޅައިބަލާއިރު މި އަހަރު ސައިބާ ހަމަލާތައް 31 ޕަސެންޓް އިތުރުވެފައި ވާކަން ފާހަގަކޮށް އިހްސާން ވިދާޅުވީ މިއީ ރާއްޖެއިން ވެސް ސަމާލުވާން ޖެހޭ ކަމެއް ކަމަށެވެ. "ރާއްޖޭގައި ކުއްޖަކު ވިހާ ހިސާބުން ފެށިގެން އެކުއްޖާގެ ރެކޯޑުތަކުން ފެށިގެން ދައުލަތުގެ ހިންގުމުގެ އެންމެ ޓެކްނިކަލް ހިސާބާ ހަމައަށް ހުރިހާ ކަމެއް މިހާރު ހިނގަމުން އަންނަމީ ސައިބާ ސްޕޭސްގެ ތެރެއިން. އަޅުގަނޑުމެންގެ އެންމަވަޔަރަމަންޓް ހިމާޔަތްކުރުމަކީ ހަމައެކަނި ވަކި އިދާރާއެއްގެ ނުވަތަ ކުންފުންޏެއްގެ ޒިންމާއެއްގެ ތެރޭގައި ހިމެނޭކަމެއް ނޫން" އިހްސާން ވިދާޅުވިއެވެ.
މީގެ އިތުރުން އިހްސާން ވިދާޅުވީ ސައިބާ އެކްސްޕޯގައި މި ދާއިރާގައި ހިމެނޭ ތައުލީމީ ބޭފުޅުންނާއި ޕްރައިވެޓް ސެކްޓާގެ ބޭފުޅުންގެ އިތުރުން ސަރުކާރުގެ އިދާރާތަކުން އެންމެ ފުރިހަމައަށް ބައިވެރިވެ، ފައިދާ ހޯދާނެ ކަމަށް އުއްމީދު ކުރައްވާ ކަމަށެވެ.
