ބަރަހަނާ މަންޒަރުތައްް ދައްކާ ހަފްލާތައް ބޭއްވުމަކީ މުސްލިމުން ކޮށްގެންވާނެ ކަމެއް ނޫން ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.

މިނިސްޓަރު ޝަހީމް މިހެން ވިދާޅުވެފައި ވަނީ އައްޑޫގައި ބޭއްވި ބޮޑީ ބިލްޑިން މުބާރާތުގެ ބައެއް ފޮޓޯތަކާއި ވީޑިއޯތަކެއް ސޯޝަލް މީޑިއާގައި ދައުރުވަމުން އަންނަ ދަނޑިވަޅެއްގައެވެ.

އައްޑޫ ސިޓީގައި ބޭއްވި ބޮޑީ ބިލްޑިން މުބާރާތެއްގެ ފޮޓޯތަކާއި ވީޑިއޯ ތަކުގައި އަންހެނުންނާއި ފިރިހެނުން މައްސުނިކޮށް ބޮޑީ ބިލްޓް ކުރާ މަންޒަރު ފެނިގެން އަންނައިރު މިފަދަ އިވެންޓެއް ފެށުމުގެ ގޮތުން ގުރުއާން ކިޔެވި މައްސަލައިގައިވެސް ގިނަ ބަޔަކު އަންނަނީ ފާޑުކިޔަމުންނެވެ. މި ގޮތުން ދީނުގައި ހަރާންކަމެއް ކުރުމަށް ގުރުއާންގެ ބަރަކާތުން ފެށުމަކީ، ދީނަށް ކުރި ފުރައްސާރައެއްގެ ގޮތުގައި ގިނަ ބަޔަކު ސިފަކުރަމުން އަންނައިރު މިކަމާ ގުޅިގެން ސަރުކާރަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ.

ސޯޝަލް މީޑިއާގައި ގިނަ ބަޔަކު މިފަދަ މުންކަރާތައް ހުއްޓުވުމަށް ގޮވާލަމުން އަންނައިރު މިނިސްްޓަރު ޝަހީމް ވިދާޅުވީ ގައުމުގެ އިޖްތިމާއީ ކަރާމަތް ނަގަހައްޓައި އިސްލާމީ ސަގާފަތު ރައްކާތެރި ކުރަން ޖެހޭނެ ކަމަށެވެ. އަދި ގުރުއާން ބާއްވާލެއްވުނީ ހިދާޔަތެއްގެ ގޮތުގައި ކަމަށް ޝަހީމް ވިދާޅުވިއެވެ.

ފަހަކަށް އައިސް ރާއްޖޭގައި ދިވެހީންގެ ދީނާއި، އާދަކާދަ އާއި ސަގާފަތާ ނުގުޅޭ ހަރަކާތްތަކާއި، މުބާރާތްތައް ބޭއްވުން އާންމުވަމުން އަންނައިރު މިފަދަ ކަންކަން ހުއްޓުވުމަށް ކަމާއި ގުޅޭ އިދާރާތަކުން އެކަށިގެންވާ ފިޔަވަޅުތައް ނާޅާކަމުގެ ތުހުމަތުތައްވެސް ގިނައެވެ.

ހަބަރު މުހައްމަދު ޝަހީމް އަލީ ސައީދު