20 އަހަރުގެ ގައުމީ ތަރައްގީގެ ޕްލޭން ތައްޔާރު ކުރުމުގެ އަމަަލީ މަސައްކަތް ފަށައިފިއެވެ.
ރައީސް ޑރ. މުހައްމަދު މުއިއްޒުގެ މެނިފެސްޓޯގައި ހިމަނުއްވާފައިވާ، ރާއްޖޭގެ 20 އަހަރުގެ ތަރައްގީގެ ޕްލޭން ހެދުމުގެ މަސައްކަތް މިއަދު ރަސްމީކޮށް އެމަނިކުފާނު ފަށްޓަވާ ދެއްވީ މުޖްތަމައުގައި ހިމެނޭ އެކި ގިންތީގެ މީހުންނާއެކު ބޭއްވި ހާއްސަ މަޝްވަރާ ބައްދަލުވުމެއްގައެވެ.
އެގޮތުން މި މަޝްވަރާ ބައްދަލުވުމުގައި ރައީސް ވަނީ ޒުވާނުންނާއި ކުޑަކުދިންނާއި އިސްރަށްވެހީންގެ އިތުރުން އެކިއެކި ސިނާއަތްތަކުގައި މަސައްކަތް ކުރާ މީހުންގެ ލަފާ ހޯއްދަވާފައެވެ.
މި ޕްލޭންގެ މަސައްކަތް ކުރިއަށްގެންދާނީ ރައްޔިތުންގެ ފުރިހަމަ ބައިވެރިވުން ހިމެނޭ ފަދަ ގޮތަކަށް ކަމަށް ރައީސް ވަނީ މީގެ ކުރިން ވެސް ވިދާޅުވެފައެވެ. އަދި ހަމައެހެންމެ ވާދަވެރި ސިޔާސީ ޕާޓީތަކާއި އެހެނިހެން ރަށްރަށުގައި ވެސް މި ޕްލޭން ގެ މަސައްކަތް ކުރިއަށްގެންދަވާނެ ކަމަށް ރައީސް އޭރު ވިދާޅުވިއެވެ.
އަދި މިއީ ގާނޫނީ ބާރުވެރިކަމާއި ހިމާޔަތް ލިބިފައިވާ ޕްލޭނަކަށް ހެދުމަށް ޓަކައި އެކަމަށް ހާއްސަކޮށް ގާނޫނެއް ހެދުމަށްވެސް އެމަނިކުފާނު ވަނީ ނިންމަވާފައެވެ. މި ޕްލޭނަކީ ދިވެހިން ބޭނުންވާ ގޮތަށް ރާއްޖެ ދާން ބޭނުންވާ މިސްރާބު 20 އަހަރު ދުވަހަށް ކަނޑައަޅާ މާސްޓަ ޕްލޭނަކަށްވާއިރު މީި ޕްލޭންގެ މަސައްކަތުގައި އެކި ދާއިރާތަކުން ބޭރުގެ މާހިރުން ވެސް ބައިވެރިވާނެ ކަމަށްވެސް ރައީސް ވަނީ ވިދާޅުވެފައެވެ.
މިއަދު ބޭއްވި ހާއްސަ ރަސްމިއްޔާތުގައި ވާހަކަ ދައްކަވަމުން ހައުސިން މިނިސްޓަރު ޑރ. އަލީ ހައިދަރު ވިދާޅުވީ، މި ޕްލޭން އެކުލަވާނީ އަހަރެއްހާ ދުވަހުގެ ތެރޭ ކަމަށާއި މިއަދު ކުރިއަށް މިދަނީ މަސައްކަތުގެ ފެށުން ކަމަށެވެ. އަދި މިކަމުގައި ހުރިހާ ރައްޔިތުންގެ އަމިއްލަ ހިޔާލާއި މަޝްވަރާ، އަދި ލަފާ ދެއްވުމަށް މިނިސްޓަރު ވަނީ އެދިވަޑައިގެންފައެވެ.
މާސްޓާޕްލޭން ހަދަން އޮސްޓްރޭލިއާގެ އެހީ ހޯދުމަށް ހައުސިން މިނިސްޓްރީން އެމްއޯޔޫއެއްގައި މިދިޔަ މަހު ސޮއި ކޮށްފައިވާއިރު އެ އެއްބަސްވުމުގެ ދަށުން، މާސްޓާޕްލޭން އެކުލަވާލުމުގައި އެހީވާން އޮސްޓްރޭލިއާ ސަރުކާރުން ވަނީ 90،000 އޮސްޓްރޭލިއަން ޑޮލަރު ނުވަތަ 9.4 މިލިއަން ރުފިޔާ ވަނީ ދީފައެވެ.
