ސިޔާސީ ޕާޓީއަކަށް ނިސްބަތްވާ މެންބަރަކު ގާނޫނާ ހިލާފުކަމެއް ކޮށްފި ނަމަ އެ އަމަލެއް ހިންގި މެންބަރަކު ނިސްބަތްވާ ޕާޓީއެއް އެއްލައްކަ ރުފިޔާއިން ޖޫރިމަނާކުރަން ސަރުކާރުން ސިޔާސީ ޕާޓީތަކުގެ ގާނޫނަށް އިސްލާހެއް ހުށަހަޅައިފިއެވެ.
މިހާރު ވެސް ސިޔާސީ ޕާޓީތަކުގެ ގާނޫނުގައިވާ ގޮތުން، އިލެކްޝަންސް ކޮމިޝަނަށް ދެ ޖޫރިމަނާއެއް ކުރެވެއެވެ. އެއީ:
- ޕާޓީއެއްގެ މެންބަރުކަމަށް ގަވައިދާ ހިލާފަށް މީހެއްގެ ނަން ހުށަހެޅުން: 5،000 ރުފިޔާ އާއި 10 ހާސް ރުފިޔާގެ އަދަދެއްގެ ޖޫރިމަނާއެއް
- އެހެނިހެން މާއްދާތަކާ ހިލާފުވާ މެންބަރުން: 30 ހާސް ރުފިޔާ އާއި 75 ހާސް ރުފިޔާ އާ ދެމެދުގެ އަދަދަކުން ޖޫރިމަނާކުރުން
ސަރުކާރުން ހުށަހެޅީ ޕާޓީއަކަށް ނިސްބަތްވާ މެންބަރަކު ގާނޫނާ ހިލާފުކަމެއް ކޮށްފިނަމަ އެއްލައްކަ ރުފިޔާއިން އެ މެންބަރަކު ނިސްބަތްވާ ޕާޓީއެއް ޖޫރިމަނާކުރަން މި ޖޫރިމަނާތަކުގެ ތެރެއަށް އިތުރުކުރުމަށެވެ.
އެއާއެކު، ޕާޓީއެއްގެ އެތެރޭގެ އިންތިހާބެއްގައި ވާދަކުރުމަށް ފަހު މައި އިންތިހާބުތަކުގައި ވާދަކުރާ ކެންޑިޑޭޓުންގެ ކެންޑިޑެސީ އިލެކްޝަންސް ކޮމިޝަނަށް ބާތިލްކުރެވޭ ގޮތަށް ކުރީގެ ރައީސް އަބްދުﷲ ޔާމީންގެ ސަރުކާރުގައި 2016 ވަނަ އަހަރުގެ ޑިސެމްބަރު މަހު ގެނައި އިސްލާހު އުވާލަން ވެސް ސަރުކާރުން ހުށަހަޅާފައިވެއެވެ.
އެކަމަކު އެ އިސްލާހު ގާނޫނަކަށްވެ، އަށް އަހަރު ފާއިތުވެގެން ދިޔައިރު ވެސް އެއްވެސް ކެންޑިޑޭޓެއްގެ ކެންޑިޑެސީ ބާތިލްކުރިކަން އެނގޭކަށް ނެތެވެ.
