އިއްޔެއަކީ ފަހުގެ ތާރީހެއްގައި އެންމެ ގިނައިން ވޯކް ވިސާ ދޫކުރި ދުވަސް ކަމަށް އިމިގްރޭޝަނުން ބުނެފިއެވެ.
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލަ ހައްލުކުރުމަށް އިމިގްރޭޝަނާއި ކަމާ ގުޅުންހުރި އިދާރާތަކުން ކުރަމުންދާ މަސައްކަތްތަކާއި ގުޅިގެން ގަވާއިދާ އެއްގޮތަށް ބިދޭސީންގެ ވިސާގެ ކަންކަން ފުރިހަމަ ކުރާ މިންވަރު މިވަނީ ވަރަށް ބޮޑަށް އިތުރުވެފައިވާ ކަމަށް އިމިގްރޭޝަނުން ބުނެއެވެ.
އިމިގްރޭޝަނުން ބުނީ އިއްޔެ ރެކޯޑު އަދަދަކަށް ވިސާ ދޫކޮށްފައިވާ ކަމަށެވެ. އެގޮތުން އިއްޔެ އެކަނިވެސް 1،069 ވޯކް ވިސާ ދޫކޮށްފައިވާ ކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަނުން މި މަހުގެ 17 ވަނަ ދުވަހު އާންމު ކުރި ތަފާސްހިސާބުތަކުން ދައްކާ ގޮތުގައި އިމިގްރޭޝަނުން ބަލާފައިވާ މައްސަލަތަކުގެ ތެރެއިން 2 ވަނައަށް އެންމެ ގިނައީ ވޯކް ވިސާގެ މައްސަލަތަކެވެ. މިގޮތުން އެއިދާރާއިން، ބަލާފައިވާ މައްސަލަތަކުގެ ގާތްގަނޑަކަށް 35 ޕަސެންޓް މައްސަލަތަކަކީ ވޯކް ވިސާއާ ގުޅުން ހުރި މައްސަލަތަކެވެ.
މި މަހުގެ 21 ވަނަ ދުވަހުގެ ނިޔަލަށް ގަވާއިދާ ހިލާފަށް އުޅެމުންދިޔަ 4،361 ބިދޭސީއަކު ޑީޕޯޓުކޮށްފައިވާ ކަމަށް އިމިގްރޭޝަންގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު ވަނީ ވިދާޅުވެފައެވެ. ޝަމްއާން ވިދާޅުވީ 186 ރެއިޑެއް ހިންގުނު ކަމަށާއި މި ރެއިޑުތަކުގައި ޖުމުލަ 1،237 ތަނެއް ބަލާ ފާސްކުރެވުނު ކަމަށެވެ.
ގަވާއިދާ ހިލާފަށް އުޅޭ ބިދޭސީންގެ މައްސަލަ ރިޕޯޓު ކުރުމަށް ހާއްސަކޮށް އިމިގްރޭޝަނުން "އިމިގްރޭޝަން ވޮޗް"ގެ ނަމުގައި މިދިޔަ ޖުލައި މަހުގެ 17 ވަނަ ދުވަހު ޕްލެޓްފޯމެއް ލޯންޗުކޮށްފައެވެ. އިމިގްރޭޝަން ވޮޗް ގެ ޒަރިއްޔާއިން ރިޕޯޓްކުރާ މައްސަލައާއި ރިޕޯޓްކުރާ މައްސަލަތަކުގެ ސިއްރިއްޔާތު ހިފެހެއްޓިގެން ދާނެއެވެ. އަދި މައުލޫމާތު ފޯރުކޮށްދޭ ފަރާތުން އެ ފަރާތުގެ މައުލޫމާތު ހާމަކުރަން ބޭނުން ނުވާ ހާލަތްތަކުގައި އެގޮތަށްވެސް ރިޕޯޓްކުރެވޭނެއެވެ.
