މާލޭގައި އިއްޔެ ކުރިއަށް ގެންދިޔަ ރެއިޑު އޮޕަރޭޝަނުގައި 3 ކެފޭއެއް ބަލާ ފާސްކޮށް 5 ބިދޭސީއަކު އަތުލައިގެންފިއެވެ.
އިމިގްރޭޝަނުން ބުނީ ގަވާއިދާ ހިލާފަށް އެ ކެފޭތަކުގައި މަސައްކަތް ކުރަމުންދިއަ 4 ބިދޭސީ ފިރިހެނަކާއި 1 އަންހެނަކު އިމިގްރޭޝަންގެ ބެލުމުގެ ދަށަށް ގެންގޮސްފައިވާ ކަމަށެވެ.
ރާއްޖޭގައި އުޅޭ ބިދޭސީންގެ މައްސަލަތައް ބޮޑުވެ، އެ މައްސަލަތައް ހައްލު ކުރުމަށް ގަވައިދާ ހިލާފަށް އުޅޭ ބިދޭސީންނާއި ގަވައިދާ ހިލާފަށް ވިޔަފާރި ކުރާ ތަންތަން ފާސްކުރަން ފެށީ މިދިޔަ އަހަރުގެ ނޮވެމްބަރު މަހުއެވެ.
އިމިގްރޭޝަނުން މައުލޫމާތު ދިން ގޮތުގައި މި މަހުގެ 21 ވަނަ ދުވަހުގެ ނިޔަލަށް ޖުމްލަ 4361 ބިދޭސީން ޑީޕޯޓުކޮށްފައިވާއިރު، ޖުމުލަ 861 ކޭސް އިމިގްރޭޝަން ވޮޗަށް ވަނީ ހުށަހަޅާފައެވެ. އަދި އޭގެތެރެއިން 596 ކޭސް އަށް އެޓެންޑުވެފައިވާކަމަށް އިމިގްރޭޝަނުން ވަނީ ބުނެފައެވެ.
އިމިގްރޭޝަންގެ މި އޮޕަރޭޝަން އިތުރަށް ފުޅާކޮށް އެކި ރަށްރަށުންވެސް ގަވާއިދާ ހިލާފަށް އުޅެމުންދާ ބިދޭސީން ދަނީ ހިފާ ހައްޔަރު ކުރަމުންނެވެ. އެގޮތުން މި މަހުގެ 26 ވަނަ ދުވަހު ކ. ގުރައިދޫގައި ހިންގި ހާއްސަ އޮޕަރޭޝަނެއްގައި 39 ބިދޭސީއަކު ވަނީ އަތުލައިގެންފައެވެ. މި އޮޕަރޭޝަނުގައި އިމިގްރޭޝަނުގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު އަދި ޑެޕިއުޓީ ކޮންޓްރޯލާ އަހުމަދު އަޝްފާނުވެސް ވަނީ އަމަލީ ގޮތުން ބައިވެރިވެވަޑައިގަންނަވާފައެވެ.
