ސަޕްލިމެންޓަރީ ބަޖެޓް އިތުރަށް ދިރާސާކޮށް ތަޅުމަށް ހުށަހަޅަން ދުވަހެއް އިތުރު ކޮށްދީފިއެވެ.
މިދިޔަ ބުރާސްފަތި ދުވަހު ސަރުކާރުން ވަނީ ދައުލަތުގެ ހަރަދުތައް ފޫބެއްދުމަށްޓަކައި މި އަހަރުގެ ބަޖެޓަށް 5.1 ބިލިއަން ރުފިޔާ އިތުރުކުރުމަށް ސަޕްލިމެންޓަރީ ބަޖެޓެއް ހުށަހަޅައިފައެވެ.
އެ ދުވަހު ބޭއްވި ޖަލްސާގައި މެންބަރުން ފާސްކުރީ ސަޕްލިމެންޓަރީ ބަޖެޓުގެ ބަހުސް ނިންމާލައި، ބަޖެޓު ދިރާސާކުރާ ކޮމިޓީ އަށް ހުށަހަޅާތާ އެއް ދުވަހުގެ ތެރޭ ސަޕްލިމެންޓަރީ ބަޖެޓު ދިރާސާކޮށް ނިންމައި ތަޅުމަށް ހުށަހެޅުމަށް ފަހު ބަޖެޓު ފާސްކުރާ ގޮތަށެވެ.
ނަމަވެސް މިއަދުގެ ޖަލްސާ ފަށްޓަވަމުން ރައްޔިތުންގެ މަޖިލީހުުގެ ރައީސް އަބްދުއްރަހީމް އަބްދުﷲ ވިދާޅުވީ، ސަޕްލިމެންޓަރީ ބަޖެޓުގެ މަސައްކަތް އެއް ދުވަހުގެ ތެރޭ ނިންމޭނެ ކަމަށް ނުބެލެވޭތީ އެއް ދުވަސް އިތުރުކޮށްދިނުމަށް އެދި ބަޖެޓު ދިރާސާކުރާ ކޮމިޓީން ސިޓީއެއް ފޮނުވާފައިވާ ކަމަށެވެ. އެހެންވެ، ސަޕްލިމެންޓަރީ ބަޖެޓު ދިރާސާކުރުމަށް ދުވަހެއް އިތުރުކުރުމަށްޓަކައި މިއަދު ވަނީ ވޯޓަށް އަހައިފައެވެ.
ވޯޓުގައި ބައިވެރިވި 80 މެންބަރުން ވެސް ވޯޓުދެއްވީ ސަޕްލިމެންޓަރީ ބަޖެޓު ދިރާސާކުރުމަށް ދުވަހެއް އިތުރުކުރުމަށް ފެންނަ ކަމަށެވެ.
ބަޖެޓް ދިރާސާކުރާ ކޮމިޓީ އެކުލެވިގެންވަނީ އިގްތިސޯދީ ކޮމިޓީ އާއި މާލިއްޔަތު ކޮމިޓީގައި ތިއްބަވާ މެންބަރުންގެ މައްޗަށެވެ.
ސަޕްލިމެންޓަރީ ބަޖެޓުގެ މުހިންމު ބައެއް ނުކުތާތައް:
- ޖުމްލަ: 5،119،508،129 ރުފިޔާ
- ޕީއެސްއައިޕީ: ދެ ބިލިއަން ރުފިޔާ
- އެސްއޯއީ: 441.4 މިލިއަން ރުފިޔާ
- ކޮންޓިންޖެންސީ ބަޖެޓު: 650 މިލިއަން ރުފިޔާ
- ދަރިވަރުންގެ ލޯނު ދޫކުރުމަށް: 458.4 މިލިއަން ރުފިޔާ
- ބޭސްތަކަށް: 200 މިލިއަން ރުފިޔާ
- ބޭސްފަރުވާގެ އެހީއަށް: 262.6 މިލިއަން ރުފިޔާ
- ސަބްސިޑީއަށް: 1.02 ބިލިއަން ރުފިޔާ
- މުސާރަ: 24.4 މިލިއަން ރުފިޔާ
ސަޕްލިމެންޓަރީ ބަޖެޓާ އެކު ދައުލަތުގެ މި އަހަރުގެ ބަޖެޓު ވަނީ 55 ބިލިއަން ރުފިޔާ އަށް ބޮޑުވެފައެވެ.
