ރާއްޖޭގައި ފުޅާ ދާއިރާއެއްގައި ހަށި ވިއްކަމުންދިޔަ ބަޔަކު އަނެއްކާވެސް އިމިގްރޭޝަނުން ހައްޔަރުކޮށްފިއެވެ.
އިމިގްރޭޝަނުން ބުނީ، އެފަދަ މީހުން ހޯދުމަށް އިމިގްރޭޝަނާއި ފުލުހުން ގުޅިގެން މި ހިނގާ އޮކްޓޯބަރު މަހު ހާއްސަ އޮޕަރޭޝަންތަކެއް ހިންގާފައިވާ ކަމަށެވެ. އެގޮތުން މިފަދަ 05 މައްސަލައަކާއި ގުޅިގެން ބިދޭސީ 07 އަންހެނަކު އަދި އެޖެންޓުންގެ ގޮތުގައި މަސައްކަތް ކުރަމުންދިއަ ބިދޭސީ 02 ފިރިހެނަކު އިމިގްރޭޝަނުގެ ބެލުމުގެ ދަށަަށް ގެންގޮސްފައިވާ ކަމަށް މައުލޫމާތު ދިނެވެ.
އިމިގްރޭޝަނުން ބުނި ގޮތުގައި މި މައްސަލަތައް ތަހުގީގު ކުރުމަށްފަހު ރާއްޖެ އަނބުރާ ނާދެވޭ ގޮތަށް މީގެތެރެއިން 05 އަންހެނަކު އަދި 01 ފިރިހެނަކު ޑީޕޯޓުކޮށްފައިވާ ކަމަށެވެ. އަދި އަނެއް 03 ބިދޭސީން ޑީޕޯޓުކުރުމުގެ މަސައްކަތް ވެސް ކުރަމުންދާ ކަމަށް އިމިގްރޭޝަނުން ވަނީ ބުނެފައެވެ.
މި މަހުގެ ކުރީކޮޅު ވެސް އިމިގްރޭޝަނުން ވަނީ ހުޅުމާލޭ ސްޕާއެއްގައި ހަށިވިއްކަމުން ދިޔަ 7 މީހަކު ހައްޔަރުކޮށްފައެވެ. އެ މައްސަލައާ ގުޅިގެން ހައްޔަރުކޮށްފައި ވަނީ ދިވެހި 3 އަންހެނުންނާއި ދިވެހި ފިރިހެނެއްގެ އިތުރުން ތައިލެންޑުގެ 3 އަންހެނުންނެވެ. އެ ފަހަރު އެ މީހުން ހައްޔަރުކޮށްފައި ވަނީ ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެންނެވެ.
ހައްޔަރުކުރެވުނު 7 މީހުންގެ ބަންދާމެދު ގޮތެއް ނިންމުމަށް ހުޅުމާލެ މެޖިސްޓްރޭޓް ކޯޓަށް ހާޒިރު ކުރުމުން ތައިލެންޑު ތިން އަންހެނުންގެ ބަންދަން 10 ދުވަސް ޖަހާފައިވާ ކަމަށް ފުލުހުން ބުނެއެވެ. އަދި ދިވެހި 3 އަންހެނުންގެ ބަންދަން ޖަހާފައި ވަނީ 7 ދުވަސް ކަމަށާއި ފިރިހެން މީހާ 5 ދުވަހަށް ބަންދުކުރުމަށް ކޯޓުން އަމުރުކޮށްފައިވާ ކަމަށް ފުލުހުން ވަނީ ބުނެފައެވެ.
އަދި ހަމައެހެންމެ މި މަހުގެ ތެރޭގައި ހަށިވިއްކުމުގެ ވިޔަފާރި ކުރުމުގައި ޝާމިލްވާ ބިދޭސީ 5 އަންހެނުންނާއި އެޖެންޓެއްގެ ގޮތުގައި މަސައްކަތް ކުރަމުންދިޔަ ބިދޭސީ ފިރިހެނަކު ވެސް ވަނީ އަތުލައިގަނެފައެވެ.
މިހާރަކަށް އައިސް މާލޭގެ ސްޕާތަކާއި ދުވަހު ކުއްޔަށް ކޮޓަރި ދޫކުރާ ތަންތަނުގައި ވެސް ހަށި ވިއްކުމަކީ އާންމު ކަމަކަށްވެފައިވާއިރު ގިނައިން މިފަދަ ކުށްތަކަށް އަރައިގަންނަމުންދަނީ ގަވާއިދާ ހިލާފަށް ރާއްޖޭގައި އުޅެމުންދާ ބިދޭސީންކަން ފާހަގަކޮށްލެވެއެވެ. ނަމަވެސް މަދުން ނަމަވެސް ދިވެހިން އަންހެނުންނާއި ފިރިހެނުންވެސް މި ފަދަ މައްސަލަތަކުގައި ޝާމިލް ވެއެވެ.
