ރައްޔިތުންގެ މަޖިލީހުގެ ކުރީގެ ނައިބު ރައީސް މޫސާ މަނިކު (ރީކޯ) ގެ ހެވީ ލޯޑު މޯލްޑިވްސް ޕްރައިވެޓް ލިމިޓެޑް ކުންފުނިން ރިސޯޓު ތަރައްގީކޮށްފައިވާ ތިން ރަށް ވިއްކާލަން ބޭންކު އޮފް މޯލްޑިވްސް (ބީއެމްއެލް) އިން މިއަދު އިއުލާނު ކޮށްފިއެވެ.
ބީއެމްއެލް އިން ބުނީ، އެ ތިން ރަށް މޯގޭޖް ކުރުމަށްފަހު ބީއެމްއެލް އިން ނަގާފައިވާ ލޯންތަކަށް ހެވީ ލޯޑު މޯލްޑިވްސް އިން ފައިސާ ނުދައްކާ ޑިފޯލްޓްވެފައިވާ ކަމަށެވެ. އެހެންކމުން އެ ތިން ރަށް ނީަލމުގައި ވިއްކާލުމަށް ނިންމައި އެ ކަމަށް ޝައުގުވެރިވާ ފަރާތްތަކުން ޕްރޮޕޯސަލް ހުށަހެޅުމަށް ބީއެމްއެލް އިން ވަނީ ފުރުސަތު ހުޅުވާލާފައެވެ.
ބީއެމްއެލް އިން ލޯނު ނެގުމަށް ހެވީ ލޯޑުން މޯގޭޖްކޮށްފައި ވަނީ ލ. އަތޮޅުގެ ތިން ރަށް ކަމަށްވާ ފަރެސް އާއި ކުޑަފަރެސް އަދި ބޮޑުހުރާ އެވެ. މި ތިން ރަށަކީ 'ރަހާ ރިސޯޓު' ހިންގާ ރަށްތަކެވެ.
މި ރަށްތައް ގަންނަން ބޭނުންވާ ފަރާތްތަކަށް ތިން ގޮތަކަށް ބިޑު ކުރުމުގެ ފުރުސަތު ވަނީ ހުޅުވާލާފައެވެ. އެއީ ފަރެސް އާއި ކުޑަ ފަރެސްއަށް ވަކިން، ބޮޑުހުރާއަށް ވަކިން އަދި ތިން ރަށް އެކުގައެވެ. ކޮންމެ ބިޑެއް ވެސް ފެށޭ އެންމެ ކުޑަ އަގަކީ 23.2 މިލިއަން ޑޮލަރު ކަމަށް ބީއެމްއެލް އިން ބުނެއެވެ.
މި ރަށްތައް ގަތުުމަށް ޝައުގުވެރިވާ ފަރާތްތަކުން އަންނަ މަހުގެ 28 ވަނަ ދުވަހުގެ މެންދުރު 12ގެ ކުރިން ޕްރޮޕޯސަލް ހުށަހަޅަން ޖެހެއެވެ. އަދި ޕްރޮޕޯސަލްތައް ހުޅުވުން އޮންނާނީ އެ ދުވަހުގެ 12 ޖަހާއިރު ކަމަށާއި އެންމެ މަތިން ބިޑު ހުށަހަޅާފައިވާ ފަރާތުން 100،000 ޑޮލަރުގެ ފީއެއް ފަސް ދުވަސް ތެރޭ ދައްކަން ޖެހޭ ކަމަށް ވެސް ބީއެމްއެލް އިން ބުނެއެވެ.
ހެވީ ލޯޑުގެ ލޯނު ނުދައްކައިގެން އެ ކުންފުނީގެ ރިސޯޓު ވިއްކާލަން އިއުލާނުކޮށްފައި ވާއިރު، މީރާ އިން މި ފަހުން އާންމު ކުރި ޓެކްސް ނުދައްކާ ކުންފުނިތަކުގެ ލިސްޓުގައި ވެސް އެ ރިސޯޓު އެބައޮތެވެ. އަދި ބިދޭސީންނާ ގުޅޭ ގޮތުން ދައުލަތަށް ދައްކަން ޖެހޭ ހުއްދަ އާއި ކޯޓާ ފީ ނުދައްކާ ކުންފުނިތަކުގެ ލިސްޓް އާންމު ކުރި އިރު، އެ ލިސްތްގައި ވެސް ހެވީ ލޯޑް މޯލްޑިވްސް ހިމެނެއެވެ.
