ޗައިނާގެ ބައެއްގެ ގޮތުގައި އެގައުމުން ގަބޫލު ކުރާ ޓައިވާނުގެ ފޮރިން މިނިސްޓަރު ލިން ޗިއާ ލަންގް، ގުއެޓެމާލާ އަށް ވަޑައިގަންނަވާތީ އެ ގައުމަށް ޗައިނާއިން އިންޒާރެއް ދީފިއެވެ.
ޗައިނާގެ ހާރިޖީ އޮފީހުގެ ތަރުޖަމާން ލިން ޖިއާން ވިދާޅުވީ، ދުނިޔޭގައި އޮންނާނީ އެންމެ ޗައިނާ އެއް ކަމަށާއި ޓައިވާނަކީ ވަކި ނުކުރެވޭނެ ޗައިނާގެ ބައެއް ކަމަށެވެ. އަދި ޗައިނާ ތަމްސީލުވަނީ އެ ބަޔާއެކު ކަމަށާއި އެއީ މީގެ 53 އަހަރު ކުރިން އދ ގެ އާންމު މަޖިލީހުގެ ގަރާރު 2758 އިން ބަލައިގެންފައި އޮތް ގޮތް ވެސް ކަމަށެވެ.
އަދި ދުނިޔޭގެ 183 ގައުމަކުން ޗައިނާ އާއެކު ސިޔާސީ ގުޅުން ގާއިމު ކޮށްފައި ވާއިރު ޓައިވާނުގެ ނަމުގައި އެކިއެކި ފަރާތްތަކާއެކު ސިޔާސީ ގުޅުން ގާއިމު ކުރުމަށް މަސައްކަތް ކުރަނީ ސިޔާސީ ގޮތުން އޮޅުވާލުމަށް ކަމަށެވެ. އަދި 'މިނިވަން ޓައިވާން' ގެ ނަމުގައި ހިންގާ ކެމްޕެއިނުން ލިބޭނެ ހަމަ އެއްވެސް މޮޅެއް ނޯންނާނެ ކަމަށާއި ޓައިވާން ހިމެނޭހެން އޮންނަ 'ވަން ޗައިނާ' ސިޔާސަތަށް ލޮޅުމެއްވެސް ނާރާނެ ކަމަށެވެ.
އަދި ގުއެޓަމާލާގެ މުސްތަގުބަލަށާއި ދެމެހެއްޓެނިމި ގޮތެއްގައި ގުޅުން ކުރިއަށް ދާނީ ޗައިނާ އާއެކު އޮންނަ ސިޔާސީ ގުޅުމެއްގައި ކަން އެގައުމުގެ ރައްޔިތުންނަށް އެނގޭނެ ކަމަށް ވެސް ތަރުޖަމާން ވިދާޅުވެއެވެ. އެހެން ކަމުން ގުއެޓަމާލާއިން ލަސް ނުކޮށް ހަމަމަގުން ކުރިއަށް ދާނެ ކަމަށް އުއްމީދު ކުރައްވާ ކަމަށް ވެސް އޭނާ ވަނީ ވިދާޅުވެފައެވެ.
ޓައިވާނަކީ ޗައިނާ ކައިރީގައި ޗައިނާ އާ ވަކިވެފައި އޮންނަ ކުޑަ ރަށެކެވެ. ޖަޕާނުން ޓައިވާނުގެ މައްޗަށް ނުފޫޒު ފޯރުވަމުން ދަނިކޮށް ދެވަނަ ބޮޑުހަނގުރާމައިގެ ދުވަސް ވަރު ޖަޕާނު ބަލިވެ އަމާން ދިނުމާއެކު 1945 އިން ފެށިގެން ޓައިވާނު އޮތީ ޗައިނާގެ ދަށުގައެވެ. އޭރުންސުރެ މިއަދާ ހަމައަށް އެހެން އޮތް ނަމަވެސް ޓައިވާނުން ވަކިވެގަތުމަށް ކުރާ މަސައްކަތް ހުއްޓައެއް ނުލައެވެ.
