މީހުން ނިދާފައި ތިއްބާ އިޒްރޭލުން އީރާނަށް ދިން ހަމަލާގައި ސިފައިންގެ 4 މީހަކު މަރުވި ކަމަށް އެގައުމުން ބުނެފިއެވެ.
އޮކްޓޯބަރު 2 ވަނަ ދުވަހު އީރާނުން އިޒްރޭލަށް ދިން މިސައިލް ހަމަލާގެ ބަދަލުހިފުމުގެ ގޮތުން އިޒްރޭލުން ބުދަދުވަހު ދިން މިސައިލް ހަމަލާގައި މަރުވެފައި ވަނީ ހަމަލާތައް އަމާޒުވި ބައެއް ތަންތަނުގައި ތިބި ސިފައިންނެވެ. އިޒްރޭލުން ބުނާގޮތުން ހަމަލާ އަމާޒު ކުރީ އީރާނުގެ އަސްކަރީ ތަންތަނަށާއި މަގާމުތަކަށެވެ. އެގޮތުން ޑްރޯން އުފައްދާ ފެކްޓަރީ އަކާއި މިސައިލް އުފައްދާ ތަނެއް ހިމެނޭހެން ޖުމްލަ 21 ތަނަކަށް ހަމަލާ ދިން ކަމަށް ބުނެއެވެ.
މި ހަމަލާތަކާ ގުޅިގެން އީރާނުން ބުނީ، ގައުމު ދިފާއު ކުރުމުގެ ޒިންމާ އީރާނަށް ވެސް އޮންނާނެ ކަމަށާއި ނަމަވެސް ސަރަހައްދީ ހަމަޖެހުމާއި ސުލްހަ މަސަލަސްކަން ވެސް އިސްކުރާނެ ކަމަށެވެ.
އޮކްޓޯބަރު 1 ގައި އީރާނުން އިޒްރޭލަށް އިން ހަމަލާގައި 200 ބެލެސްޓިކް މިސައިލް ބޭނުން ކުރިއެވެ. އޭގެ ތެރެއިން މަދު އެއްޗެއް އާންމުންނާ ދުރަށް އިޒްރޭލުގެ ބައެއް ސަރަހައްދުތަކަށް އެރި ނަމަވެސް ގިނަ ހަމަލާތައް އިޒްރޭލުން ވަނީ ވައިގެ ތެރޭގައި ނާކާމިޔާބު ކޮށްލާފައެވެ.
ބުދަ ދުވަހު އިޒްރޭލުން އީރާނަށް ދިން ހަމަލާގައި 100 ފައިޓާޖެޓް ބޭނުން ކުރި އިރު ދިން ހަމަލާތަކުގެ ތެރެއިން ގިނަ ހަމަލާ އީރާނުން ވަނީ ވައިގެ ތެރޭގައި ނާކާމިޔާބު ކޮށްލާފައެވެ. ބައެއް މިސައިލްތައް އަމާޒަށް ވާސިލުވެ ލިބުނު ގެއްލުމަކީ ކޮބައިކަން އީރާނުން ރަސްމީކޮށް ހާމަ ނުކުރި ނަމަވެސް ބޭރުގެ ބައެއް މީޑިއާތަކުން ބުނީ، އީރާނުގެ ޑްރޯން ފެކްޓަރީއެއް ހަލާކު ވި ކަމަށެވެ.
އީރާނުން އިޒްރޭލަށް ދިން ހަމަލާ އަކީ، އީރާނުގައި ހުންނަވަނިކޮށް ހަމާސްގެ ލީޑަރު އިސްމާއީލް ހަނިއްޔާ އަވަހާރަ ކޮށްލުމުގެ ބަދަލު ހިފުމަށާއި، ސީރިއާގައި ހުންނަ އީރާނުގެ ކޮންސިއުލޭޓަށް އިޒްރޭލުން ހަމަލާދީ ބައެއް ބޭފުޅުން އަވަހާރަކޮށްލުމާއި، އީރާނުން މަދަދު ދޭ ހިޒްބުއްލޯގެ ލީޑަރު ހަސަން ނަސްރުﷲ އަވަހާރަ ކޮށްލުމުގެ ބަދަލު ހިފުމަށް ދިން ހަމަލާއެއް ކަމަށް އީރާނުން ބުނެއެވެ.
އިޒްރޭލުން އީރާނަށް ދިން ހަމަލާގައި ވެރިރަށް ތެހެރާންގެ ބައެއް ތަންތަނާއި ކުޒެސްތާން އަދި އިލާމް ޕްރޮވިންސުގެ ބައެއް ތަންތަން ހިމެނެއެވެ. މި ހަމަލާތަކަށް ފަހު އީރާނުން ބުނެފައި ވަނީ މާބޮޑު ގެއްލުމެއް ނުވާ ކަމަށާއި އާންމު ހާލަތުގައި ހުރިހާ ކަމެއްވެސް ހިނގަމުން ދާ ކަމަށެވެ.
