ކ. ގުރައިދޫގައި ކުރިއަށް ގެންދިޔަ ހާއްސަ އޮޕަރޭޝަނެއްގައި 39 ބިދޭސީއަކު އަތުލައިގެންފިއެވެ.
އިމިގްރޭޝަނުން ބުނީ ބިދޭސީންގެ މައްސަލަ ހައްލުކުރުމަށް ފަށާފައިވާ މަސައްކަތުގެ ތެރެއިން 24 އޮކްޓޫބަރުގައި ވަނީ ހާއްސަ އޮޕަރޭޝަނެއް ފަށާފައި ކަމަށާއި މި އޮޕަރޭޝަން ފުރަތަމަ ކުރިއަށް ގެންގޮސްފައިވަނީ ގުރައިދޫގައި ކަމަށެވެ.
އިމިގްރޭޝަނުން ބުނީ މި އޮޕަރޭޝަނުގައި އިމިގްރޭޝަނުގެ 20 އޮފިސަރުން އަދި 9 ފުލުހުން ހަރަކާތްތެރިވެފައިވާކަމަށެވެ. މި އޮޕަރޭޝަނުގައި އިމިގްރޭޝަނުގެ ކޮންޓްރޯލާ ޖެނެރަލް މުހައްމަދު ޝަމްއާން ވަހީދު އަދި ޑެޕިއުޓީ ކޮންޓްރޯލާ އަހުމަދު އަޝްފާނުވެސް ވަނީ އަމަލީ ގޮތުން ބައިވެރިވެވަޑައިގަންނަވާފައެވެ.
މި ހަރަކާތާއި ގުޅިގެން ޝަމްއާން ވިދާޅުވީ މި ހަރަކާތަކީ މާލޭގައި ގަވައިދާ ހިލާފަށް އުޅޭ ބިދޭސީން އަތުލައިގަންނަން ފެށުމާއެކު ބައެއް ބިދޭސީން އަތޮޅުތަކަށް ފިލަން ދިއުމާއި، އަދި އަތޮޅުތަކުގައިވެސް ގަވައިދާ ހިލާފަށް ބިދޭސީން އުޅޭ ކަމުގެ ޝަކުވާ އިމިގްރޭޝަނަށް ލިބެމުންދާތީ އަތޮޅުތަކަށް މި ހަރަކާތް ފުޅާކުރުމަށް ކުރަމުންދާ މަސައްކަތުގެ ތެރެއިން ފެށުމެއް ކަމަށެވެ.
އިމިގްރޭޝަނުން ބުނީ ގުރައިދޫގައި ކުރިއަށް ގެންދެވުނު މި އޮޕަރޭޝަނުގައި 42 ތަނެއް ބަލާ ފާސްކޮށް 106 ބިދޭސީއަކު ޗެކުކުރެވިފައިވާ ކަމަށެވެ. އަދި ވިސާ ފުރިހަމަ ނޫން 11 ބިދޭސީއަކަށް އިމިގްރޭޝަނަށް ހާޒިރުވުމަށް ލިޔުން ދީފައިވާކަމަށާއި، ވަޒީފާ ދޭ 5 ދިވެހިންނަށްވެސް ލިޔުމުން ނަސޭހަތްތެރިވެފައި ވާކަމަށް އިމިގްރޭޝަނުން ވަނީ ބުނެފައެވެ.
ރާއްޖޭގައި އުޅޭ ބިދޭސީންގެ މައްސަލަތައް ބޮޑުވެ، އެ މައްސަލަތައް ހައްލު ކުރުމަށް ގަވައިދާ ހިލާފަށް އުޅޭ ބިދޭސީންނާއި ގަވައިދާ ހިލާފަށް ވިޔަފާރި ކުރާ ތަންތަން ފާސްކުރަން ފެށީ މިއަހަރު މެދުތެރޭގައެވެ. އެއާއެކު ގިނަ ތަންތަން ބަލައި ފާސްކޮށް 4300 އަށް ވުރެ ގިނަ ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސް އަދި ޑީޕޯޓްކޮށްލާފައެވެ.
މި ސަރުކާރުން ބިދޭސީންގެ މައްސަލަ ހައްލު ކުރުމަށް ހިންގާ އޮޕަރޭޝަންގެ ތެރެއިން މި މަހުގެ 21 ވަނަ ދުވަހުގެ ނިޔަލަށް ވަނީ ޖުމްލަ 4361 ބިދޭސީން މިހާތަނަށް ވަނީ ޑީޕޯޓް ކޮށްލާފައެވެ. މިހާތަނަށް ޖުމުލަ 861 ކޭސް އިމިގްރޭޝަން ވޮޗަށް ހުށަހެޅާފައިވާ އިރު އޭގެތެރެއިން 596 ކޭސް އަށް ވަނީ އެޓެންޑުވެފައެވެ.
