ދިވެހިރާއްޖޭގެ އެކްސްކުލޫސިވް އިކޮނޮމިކް ޒޯން (އީއީޒެޑް) ގެ ތެރެއިން ދެކުނު ކަނޑުގެ ސަރަހައްދުން ބައެއް ގެއްލޭ ގޮތަށް އިންޓަނޭޝަނަލް ޓްރައިބިއުނަލް ފޯ ދަ ލޯ އޮފް ދަ ސޯ (އިޓްލޮސް) އިން ކޮށްފައިވާ ހުކުމް (ޗާގޯސް މައްސަލަ) އާ ގުޅިގެން ސަރުކާރުން ވައުދުވެފައިވާ ގޮތަށް އެއްވެސް ފިޔަވަޅެއް ނާޅާތީ ދަ ޑިމޮކްރެޓްސް އިން ކަންބޮޑުވުން ފާޅުކޮށްފިއެވެ.

މިކަމާ ގުޅިގެން ކަންބޮޑުވުން ފާޅުކޮށް ނެރުނު ނޫސް ބަޔާނުގައި ދަ ޑިމޮކްރެޓްސްއިން ބުނީ ޗާގޯސްގެ ރަށްތަކުގެ ސިޔާދަތާ ގުޅޭ ގޮތުން ދިވެހިރާއްޖެއިން ޒަމާނުއްސުރެ ގެންގުޅެމުންދިޔަ ސިޔާސަތު ނިމިދިޔަ ސަރުކާރުން ބަދަލުކުރެއްވި ކުރެއްވުމުން ދިވެހިރާއްޖެއަށާއި ދިވެހީންނަށް ލިބުނު ގެއްލުމާމެދު ރައީސް ޑރ. މުހައްމަދު މުއިއްޒުގެ ސަރުކާރުން ވެސް މިހާތަނަށް ފިޔަވަޅެއް އަޅުއްވާފައިނުވާ ކަމަށެވެ.

ޗާގޯސްގެ ރަށްތަކުގެ ސިޔާދަތާ ގުޅޭގޮތުން އުފެދިފައިވާ ދެބަސްވުމުގައި، ޗާގޯސްގެ މައްޗަށް މޮރިޝަސްގެ ސިޔާދަތީ ބާރު ގަބޫލުކުރައްވައި، ދިވެހިރާއްޖޭގެ ފަރާތުން ދައުވާކުރުމުގެ ހައްގު ނިމިދިޔަ ސަރުކާރުން ސިއްރު ސިޓީއަކުން ދޫކޮށްލާފައިވާ ކަމަށް ދަ ޑިމޮކްރެޓްސްއިން ބުނެއެވެ. އަދި އދ. ގައި އެގޮތަށް ވޯޓުދިނުމަކީ ދަ ޑިމްކޮރެޓްސްއިން މީގެކުރިން ވެސް ކުށްވެރިކުރި ކަމެއްކަން އެ ޕާޓީއިން ވަނީ ފާހަގަކޮށްފައެވެ.

ދިވެހިރާއްޖޭގެ އެ ނިންމުން އަލުން މުރާޖައާކުރާނެ ކަމަށާއި ޗާގޯސްގެ ރަށްތަކުގެ ސިޔާދަތުގެ މައްޗަށް ދައުވާކުރުމުގެ ހައްގު އަލުން ހޯއްދަވާނެ ރައީސް މުއިއްޒުގެ ސަރުކާރުން ބުނެފައިވާކަން ޑިމޮކްރެޓްސްއިން ވަނީ ފާހަގަކޮށްފައެވެ.

ނަމަވެސް މި ސަރުކާރުން ވެސް އެކަމާމެދު އެއްވެސް ފިޔަވަޅެއް އަޅާފައި ނުވަނީސް، އިނގިރޭސިވިލާތުގެ ސަރުކާރުން ޗާގޯސް މޮރިޝަސްއާ ހަވާލުކުރުމަށް ނިންމާފައިވާކަން ފާހަގަކޮށް ދަ ޑިމޮކްރެޓްސްއިން ބުނީ މިއީ ދައުވާކުރުމުގެ ހައްގު ދިވެހިރާއްޖެއިން ދޫކޮށްލުމުގެ ސަބަބުން ނުވަތަ އެ ހައްގު އަލުން ހޯދައިދިނުމަށް މަސައްކަތްނުކުރުމުގެ ސަބަބުން ދިވެހިރާއްޖޭގެ ސިޔާދަތައް ލިބިގެންދާ ގެއްލުމެއް ކަމަށް އެ ޕާޓީއިން ދެކޭ ކަމަށެވެ.

ޗާގޯސް މައްސަލަ މި ސަރުކާރުގެ ފުރަތަމަ 100 ދުވަހުގެ ތެރޭގައި އިސްތިއުނާފު ކުރާނެ ކަމަށް މި ސަރުކާރުން ވަނީ ބުނެފައެވެ.

ހަބަރު މޮރިޝަސް ދަ ޑިމޮކްރެޓްސް ސަރުކާރު ޑރ. މުހައްމަދު މުއިއްޒު ޗާގޯސް